國際足協禮拜三公佈咗年度頒獎禮嘅候選名單，其中上屆歐聯冠軍利物浦認真威水，被認為係年度最佳球員大熱門嘅中堅華基爾雲迪積克（VVD），聯同隊友穆罕默德沙拿同沙迪奧文尼齊齊入圍最後10強，將要硬撼兩大球王基斯坦奴朗拿度（C朗）同美斯爭獎，而喺候選名單竟然有位球星喺今年冇獎拎過，佢就係熱刺嘅哈利卡尼。另外紅軍領隊高普亦入選最佳男足教練10強，又要同曼城主帥哥迪奧拿，由場內鬥到場外囉！
話說FIFA會喺下個月23號喺意大利米蘭舉行年度頒獎禮，其中最受矚目嘅梗係以前叫世足先生嘅年度最佳男子球員會係邊位球星拎到，其中上季得主、效力皇家馬德里嘅克羅地亞中場莫迪歷，因為狀態大跌無緣最後10強，大熱門就落咗喺帶領利物浦贏得歐聯冠軍、一夫當關嘅中堅雲迪積克身上。不過佢唔係冇對手架，因為佢兩名隊友、紅軍三叉戟其中兩人沙拿同文尼都有份入圍，可能會分薄VVD嘅票源之外，VVD仲要面對C朗同美斯兩位粉絲眾多嘅球王，但若果VVD最終當選，將會係繼2006年得主簡拿華路後，事隔12屆再有後衞成為年度最佳球員。
高普哥帥爭逐最佳教練
另外有份入圍嘅球星仲包括上季為車路士贏得歐霸冠軍嘅夏薩特，帶領阿積士殺入歐聯四強嘅荷蘭孖寶法蘭基迪莊及馬菲斯迪歷特，巴黎聖日耳門法國球星基利安麥巴比同熱刺隊長哈利卡尼，其中卡尼係10強入面上季唯一冇拎到冠軍嘅球員，雖然禮拜三就幫熱刺憑互射12碼贏咗拜仁拎到奧迪盃，但睇嚟佢哋都係陪跑居多。
其他獎項方面，女足世盃冠軍美國有四名球員包括隊長娜賓露、阿歷絲摩根、艾絲同拉維入圍最佳女足球員名單。英格蘭女足主帥菲臘尼維利，亦有份入選最佳女足教練候選名單；至於最佳男足教練，利物浦主帥高普又要惡鬥曼城領隊哥迪奧拿，二人仲會喺下禮拜日嘅社區盾正面對決。
艾利臣派膠法明奴補鑊
賽前紅軍收到好消息，主將沙拿、羅拔圖法明奴同艾利臣比加已經歸隊，仲喺禮拜三嘅熱身賽對里昂正選上陣，雖然門將艾利臣派膠累球隊先失一球，好在法明奴一歸隊就有波入，加上小將哈利威爾遜射入世界波，幫紅軍3:1反勝里昂，終止季前熱身賽四場不勝。