解放軍駐港部隊近排高調搞亂香港人心，前晚網上出條新宣傳片，當中特別有段解放軍「防暴演練」，片中解放軍要示威者後退，又用廣東話連叫兩次「後果自負」，加埋大家熟悉嘅警告紅旗同亂射催淚彈埸面，然後解放軍駐港司令員陳道祥前晚再譴責港人反送中抗爭嚴重觸碰一國兩制底線，難怪大家都覺針對味濃。
究竟條片係咪咁得人驚？八方落足眼力睇完再睇，反而睇到另一啲有趣情節！第一，打頭陣反恐章節原來有部份片段循環再用，拎番3年前央視播過嘅駐港部隊特訓片剪輯，當時首度曝光嘅「轉彎的槍」，今次仲最先出場，實在太冇誠意同不求進步；其次，駐港部隊反恐演練時，面對拎手槍嘅恐怖分子，竟然用近排警隊速龍小隊最愛嘅胡椒彈槍嚟對付，反而面對手無寸鐵市民，就拎住把95式自動步槍警告大家「後果自負」，呢個差別對待，香港人嚇慣唔會驚，但隨時震驚到14億人民囉。