【港情講趣】
這年代人人一部智能手機，銀髮族亦不例外。近日風雨飄搖，當我們日日上連登fact check時，長者們上網怎樣check？誠然，多了看清形勢的老人家，自會學肥媽話齋：「選番啲真真正正嘅人入立法會。」不關你事？議會隨時靠銀髮族光復呀。
別看輕老人家，銀髮族其實很聰明，已熟用智能手機的鄺女士話：「連登我就冇上，不過而家睇新聞都會睇多幾個來源，自己辨別是非。」當中年紀最大、「8字頭」的四季叔就咁講：「facebook、IG我都有玩，我知，IG多啲後生仔用嘛，老餅就用facebook。」醒目！你以為這不關你事？導師楊學斌（Ben Sir）道出重點：「睇多啲資訊，有啲長者會從而改變政治立場。」
回看早前銀髮族遊行，可能你和我都被感動到眼濕濕。當連登仔都說要推「蓮燈」，讓銀髮族加入陣營時，原來長者們已經自行進化。訪問前，幾位長者剛上完堂，學習如何使用Windows 10。緊貼網絡潮流的四季叔很醒目，「睇動新聞囉，《蘋果》畀$3，我一早畀咗啦，自己上網畀。」採訪前，中心主任話我知，其中一位受訪者Simon曾說：「等陣做訪問係邊間？《蘋果》呀？《蘋果》我就做，其他靠唔住。」除了多謝，我也不知說甚麼好。更醒目的是，長者懂得這樣問：「之後正式收費畀唔畀錢？睇吓一個月收幾錢先。」
買馬打牌整長輩圖 「人人有唔同理由」
自2005年起，香港耆康老人福利會的長青數碼教室，已開辦與新科技相關的課程。中心主任郭韻堯指，「呢個『飛躍天地』2005年已經開始，新科技新玩法越嚟越多，我哋都不斷教新嘢畀老人家。」非牟利機構有免費與收費的課程，後者最平二百多元四堂。到底係乜嘢驅使長者即使畀錢，都要學用智能手機同上網呢？理由好率性簡單，「想同仔女、孫仔孫女多啲溝通啦，等巴士又想知部巴士幾時到啦。」其他人附和，「係呀，仲有網上投注買馬，有好多老人家問我哋點用，仲有，都有人問過我哋點用手機打機，話想打麻雀喎。」伯伯，小賭怡情呀。
Ben Sir教長者上網接近九年，「佢哋人人都有唔同理由，試過有位長者患腦退化症，醫生話會越嚟越差，想好啲，就要試吓學多啲新嘢，佢學上網後，醫生話情況穩定咗喎，於是佢就越學越多。」除咗學上網、用智能電話，中心還有製作GIF、剪片、學習PhotoShop的課程，「有啲長者想學整長輩圖，有啲就為興趣。」學這麼多，豈不是記性稍差也吃不消？「有啲長者隔一排唔記得，又報堂上過，呢個情況成日都會發生。」
踢爆假圖假片 「睇完自己再思考」
首先，不是每位長者都懂得「長輩圖」，四位又點睇？四季叔直言「未聽過」，羅女士就話「唔知」。鄺女士有聽過，「祝福人嗰啲嘛？」Simon最醒目，「知你今日會問，今朝先問咗阿Sir。」之後我解釋，即是顏色好鮮艷、多數有蓮花做背景的圖片。四季叔即刻恍然大悟，「哦，好多好多！」鄺女士就覺得，「啲圖有啲煩，不過係搶眼嘅。」至於羅女士就指，「哦，問候人嗰啲，都會睇嘅。」那知道每張圖都要加一句「好人一生平安」的意思嗎？Simon答得有道理，「咁老人家都係多數講呢啲啦，祝人平安呀健康呀，正常嘅。」四季叔就話：「咁祝福人又唔嫌多，有時都會轉發畀人。」結論，口裏說不，轉發最誠實。
小人當道，很多人擘大眼講大話，更有人砌假圖、剪假片去欺騙兼誣衊人，所以我們都要fact check。
一有空就機不離手的四季叔一臉自信地說：「做咗咁多年人，靠自己經驗都分辨到嘅，喺facebook嗰啲都係自己朋友，現實中都識咗好耐，靠得住嘅。」鄺女士說：「我睇《蘋果》之餘，都有睇埋其他報紙，最少睇兩份，睇完自己再思考，睇吓邊個啱。」有人仲話：「而家冇咗手機真係唔掂。」對，只看電視也不行。
fb少放私生活 「而家好興起底呀」
四季叔有睇YouTube，有用支付寶，因轉數快。當中通訊app更加最常用，「香港朋友就用WhatsApp，國內朋友就用WeChat。」羅女士就用支付寶、地圖同搵食app，「仲有電子付款app，超級市場買嘢畀錢方便嘛，國內更加重要，而家返大陸玩都唔帶錢。」Simon也認同，「而家大陸好多地方都唔收現金，我試過微波爐壞咗，打電話去廠搵人整，三日都唔覆我，上網登記預約又好快覆喎，而有時去餐廳食飯，佢要我哋上facebook畀個like，就多件壽司！」佢仲話：「而家除咗食飯瞓覺，一半時間都用手機，唔記得帶手機慘過唔記得帶銀包。」四位老人家最同意的是，通訊app能聯繫人與人之間的溝通，「冇裝WhatsApp、WeChat嗰啲朋友，而家真係少見咗嘅。」
四人都有玩facebook，關心時事之餘，都關心身邊朋友，不過他們都說「睇嘅多」，「網絡世界冇秘密。」「多數睇人哋，自己嘅嘢唔想俾人知。」「係呀，啲人而家好興乜話？起底呀。」手機方便網絡發達，唯一少少驚的，可能是私隱問題。
我本來想拍他們的手機主頁，看他們裝了甚麼app，但他們都很醒地回應：「要解鎖，有私人嘢喎。」好啦，咁就啱喇。
facebook：耆康會飛躍天地長者電腦學習中心
記者：陳孝義
攝影：徐振國