建制派文宣為何不受愛國人士以外嘅市民歡迎？愛國人士即是聽黨話、跟黨走，沒有自由思想及獨立精神之人，形同應聲蟲（按：敢回聲就是妄議中央，罪大惡極），愛國人士之中，有不少係藍絲有錢人、有錢闊太及年老低教育程度人士，佢地係幾難有思想嘅，一啲闊太去米蘭買時裝、巴黎買完手袋之後，想起老公憑中國貿易/設廠搵到大錢，當然係向錢看，大罵死0靚仔不知好歹啦，年老低教育嘅愛國人士最易受工聯會影響，工聯會叫佢地講乜，佢地咪講乜嘢。
上星期與一位退休廣告人在渣打銀行地庫嘅Mott 32（三二公館）吃午飯，點心與叉燒都幾好，對老嘢而言，只嫌燈光昏暗，落樓梯要非常小心。廣告前輩話：「此乃現代式裝修，你睇吓呢度坐滿年青才俊，我兩個最老，而且講英文嘅唔少！」但係，點解前輩要到現代式粵菜吃飯，前輩話：「我地搞慣創作，要保持心境年輕，所以唔去你常去嘅陸羽！」
真係服咗佢，仍然擁有年青心態，於是想起宣傳，問佢：「點解支持送中嘅宣傳衰晒，建制派文宣網上捱打？」前輩話：「你問得好，我幾個星期前見到一位創作高手，以前係大廣告公司creative director，本已提早退休去教書，已不再到中環、太古坊活動。但後來唔抵得林鄭專橫，在社交網頁搞『眾籌』，唔係籌錢，而係籌集廣告talent，估唔到反應熱烈，大量廣告界後起之秀響應，全部願意做義工，搞數碼創作，搞文字宣傳，去外國大報賣廣告，無論中英文撰稿與製作短片，鋪鋪一擊即中，根本係4A廣告水準。據我所知，廣告創作界慣咗創作思想自由，無束縛，絕對不合『聽黨話、跟黨走』，有人畀錢請佢地為建制派做文宣，全部耍手擰頭。你話建制派嗰邊何來創作高手吖。」
聽前輩講完，明晒！建制派有兩大才女，皆出身肥佬黎嘅壹週刊，就是屈小姐與潘小姐，現皆資深梁粉，潘小姐在7月20日在明報專欄「女人心」寫平亂三大「殺手鐧」，豈可不看，殺手鐧究竟係乜，原來潘小姐講在捱打狀態，必須（一）建立個快速反應的心戰室，（二）組織一支可靠及反應敏捷的文宣隊，重奪話語權，（三）對暴徒勢力絕不妥協、手軟或姑息。除咗第三項要搵警察之外，頭兩項係要靠智囊、廣告高手及寫手，都唔知去邊度搵到，當然有屈潘兩位壓陣，但係兩人都冇乜新思維，講來講去都係昨日本欄寫過嘅八股，何以服眾？林鄭競選時，宣傳輸晒就因為長者麥女士輸畀年輕羅永聰，依家佢身邊無人，更弊，靠屈潘兩位才女平亂？林鄭信唔信呢？