反送中變成全民抗爭運動，資訊滿天飛話題日日唔同，就算有fact check都冇用。好似前晚開始，當40幾個義士被控暴動，大家除咗關心痛心，仲忽然關注起612人道支援基金，有人不斷網上出文，指摘基金幫唔到手，仲話義士將來要自己找律師費，甚至拎埋當日旺角暴動案一齊講。
有人即科水$8,000
基金有見及此，事後好快出澄清啟事，講明會「支援法律開支直至案件完結」，點知基金鼓勵人申請法援竟然出事，被圍插質疑叫義士用「政府嘢」，除咗未必信得過，仲可能會唔夠班云云，似乎大家對香港法律制度真係唔多認識。其實只係政府出錢，而好多星級大狀一直有收「法援價」落場幫抗爭者辯護，所以大家唔使咁擔心。至於旺角暴動案，612基金6月先成立，係咪關事大家心中有數啦！
咁點解有人不斷講612基金壞話，八方唔想估係咪有抹黑，只想提提大家秉持各自努力原則。有連登網民就非常有心，聽完澄清釋除疑慮就即刻磅水，公告已課8,000蚊畀基金，亦有網民話剛剛收到政府派嘅4,000蚊，所以又係時候再作支持，總之繼續有錢出錢，有力出力。
李八方