【中環】視后李佳芯日前喺中環同「蝦頭」楊詩敏拍攝新劇《愛美麗狂想曲》外景，劇情講述李佳芯因事嬲咗蝦頭，仲向佢發脾氣，兩女期間發生拗撬，後來蝦頭決定認低威，向李佳芯道歉，不過李佳芯似乎仲好嬲，蝦頭於是扮鬼臉𠱁對方開心。因為蝦頭肯主動言和，李佳芯好快就冇再嬲，同蝦頭冰釋前嫌，佢哋仲和好如初蹺住手一齊離開。行到去街頭聽到有人busking，佢哋仲聽得好投入。
撩BB玩
拍攝當日下午，着住桃紅色上衣襯短褲嘅李佳芯，露出一對白滑長腿，不過就唔覺意畀蝦頭搶鏡，事關着住黑色鬆身衫襯藍色外套嘅蝦頭，因為要扮鬼臉，而佢又比較大動作，郁一郁身，蝦頭嘅闊領套裝就唔小心咁騷咗深長事業線，李佳芯嘅靚腳都被比下去。
而佢哋喺拍攝期間，就被途人野生捕獲，上前要求合照，李佳芯同蝦頭都好親民，未有托手踭，見到其中有一個媽咪抱住BB，佢哋合照嗰陣係咁撩BB玩，似乎曾喺另一劇集中演過媽咪嘅李佳芯，母愛爆燈。
採訪、攝影：孔志豪、吳耀輝
