廣告人響應805罷工，原本選擇地點太古坊。之所以選鰂魚涌，很明顯是因為從前絕大部份的廣告公司都開在這裏，如今雖然有好多都因為不敵貴租搬到觀塘、數碼港、北角、上環等地，但要搵個有代表性又有感情的地方，應該非太古及鰂魚涌莫屬。除了現役的廣告人，當中也有很多離開了這個行業的舊同事，今次罷工，一呼百應，為香港加油。
前晚突然宣佈將地點改為金鐘添馬公園，重歸大三罷金鐘大隊，順便搵吓創作靈感咁話。我即時做了一個網上快速統計，發現原來在我們眾多廣告朋友之中，罷工都分好多種，睇吓你會唔會屬於其中之一。
有些人話，就當成自己公司Team Building，橫掂星期一都冇咩人返工，不如一齊約埋去食個午飯，同事上下，加強一下溝通，增進一下感情。另一種，有些好耐冇見的舊同事，近年已經各散東西，今次擇日不如撞日，就當出來聚舊Reunion啦。
唔講可能唔知，罷工，原來有分「明罷」與「暗罷」。「明罷」，擺到明由公司號召，老闆吹雞，攞正牌出嚟行；亦有些公司沒有主動號召，但就講到明，尊重員工的罷工決定，應承不反對，也不扣假。而「暗罷」，即老闆既無答應，亦無默許，甚至反對，要罷，就只好自己詐病請假，或晨早出去開會，唔理真開定扮開，總之冇人篤爆就得。
仲有一種係「罷啲唔罷啲」，由於某些理由，例如當天安排了甚麼重要的世紀會議，只可以中間偷雞出嚟支持吓，正所謂有到好過No Show，唔該晒。
罷工，無論用以上邊個理由，目的就只有一個。既然過去個幾月試過咁多方法都冇人睬，仲有咩可以做？只能咩都試吓，結果有冇用都好，罷咗先算，打死罷就，一於星期一，說罷就罷。最後希望大家唔好多多藉口，「欲罷不能」。
文迪晞
mailto:[email protected]