日前網民喺港鐵發起不合作運動，抗議港府拒撤送中惡法、警方濫用武力對付示威者，有唔少港鐵乘客唔介意受影響，支持佢哋行動，但香港有啲人對準時返工有近乎上癮嘅情意結，總有人鬧佢哋阻人返工，一班藍絲更上晒身咁，係咁喺fb開po鬧黃絲搞到市民返唔到工。
到噚日掛八號風球，今次到班網民出手揶揄班藍絲，有人喺網上瘋傳長輩圖（圖），話八號風球其實係天文台黃絲員工詭計，目的係製造不合作運動，等人人唔返工破壞香港經濟，叫愛國愛港同胞千萬不要中計，立即掉頭返公司開工！當然對班藍絲嚟講梗係睬你都儍，放早半日唔係約人開枱就係返屋企煲劇！亦反映唔開一日半日工，根本冇乜大不了，咁8.5響應號召，罷工反警暴同送中惡法，又有乜問題？最多咪當打多日八號風球！