網絡讀了杜汶澤一段話，笑到叫救命，相逢恨晚之感頓生，在這種悲情時勢，沒理由不與大家分享，舒緩一下神經：「佢哋係真心膠，阿倫每日淨係關心食啲乜，你睇吓佢個肚腩，佢哋係好typical嘅廢佬。中意聽佢唱歌同佢人格有咩關係？點解覺得譚詠麟係變咗呢？你又識佢咩？或者佢一路都係咁。鍾鎮濤咪講咗囉，佢唔明啲後生講咩，你唔識佢，我識佢，佢人好nice、心地好，但係個好蠢嘅人；明星唔使聰明，佢靚仔、佢唱歌㗎嘛，大部份明星都係蠢，聰明都做咗生意啦，你睇古天樂。」嘩，我仲以為自己天生毒舌，得罪人唔使本，原來最多只不過是跑龍套的小巫，平日山中無虎也文也武，大巫一登場，只好夾起條尾落荒而逃。人蠢究竟有冇藥醫，當然見仁見智，就像深藍圈呢期廣傳一張七二七拍的蘋果黎照片，下書「最開心的就是肥佬，帶着AV男元朗買老婆餅，喝茶，so relaxing！」，一派挖到獨家黑材料的沾沾自喜，教人渾身冒汗：嗰日白衣人出動前，入元朗行街嘅市民個個都身心愉快㗎啦，有乜咁稀奇？
素來對俊男另眼相看的膚淺粉，更有雙頰同時被摑的痛楚，馬上強迫自己回答一條問題：如果阮經天扯爛件衫挺起胸膛企出嚟撐暴警撐暴政撐黑社會，你會唔會繼續視他為顏射最佳標靶吖？呃，恐怕把口點硬，誠實的身體都不受控制，嗚嗚嗚。但是顏值專家最震驚的，是短短時間內分別聽到一個新知一個舊雨話，幾廿年前初出道的何妖「好眉好貌」，嘩，唔係嗄哇，我唔想將啱啱落肚嘅美食嘔番出嚟呀！