鄭則仕、苑瓊丹、邵美琪、黎諾懿同黃智雯主演嘅無綫喜劇《街坊財爺》，本來定咗喺上個禮拜一播出，不過無綫突然抽起，改播譚俊彥、張振朗同胡定欣主演嘅古裝劇《包青天再起風雲》，當時《街》劇監製梁材遠接受傳媒訪問時，承認係臨時變陣，仲話擔心苑瓊丹已經買機票返港宣傳。據知變陣咁急，原來同近兩個月「反送中」引發嘅警民衝突有關。
首集有衝突場面
《蘋果》收到消息，《街坊財爺》雖然係輕鬆喜劇，但第一集已經有大型警民衝突場口，無綫2019節目巡禮嘅宣傳片中，飾演貴利王嘅鄭則仕就帶住大班黑衫人包圍警署，之後仲殺入警局對峙，氣氛緊張，旁白：「一個縱橫黑白兩道嘅貴利貸」。所謂崩口人忌崩口碗，無綫怕觸動到警察同市民神經，所以先自我審查，決定抽起，順延到下月，即係《包青天》之後播出。不過，𠵱家警民衝突比兩個月前仲激烈，睇怕好大機會再抽起。《蘋果》曾經聯絡鄭則仕，但佢一直冇覆。
其實今個Amazing Summer黃金時段劇集，無綫已先後抽起多部關於警察題材嘅劇集，包括張振朗、楊明、蔡思貝等主演嘅《機場特警》、苗僑偉同黃宗澤、吳卓羲嘅邵氏劇《飛虎之雷霆極戰》，汪明荃仲客串扮演特首，𠵱家播出無期。
撰文：馮仁昭