科技日新月異，自從智能手機出現咗後，又有鏡頭收音又好，加上唔少社交平台家陣都有直播功能，隨時隨地就可以「開live」。不過方便都係有代價，因為你隨時連同伴侶交歡嘅過程都直播畀晒人睇，就好似前熱刺前鋒尼積爾咁樣，佢真係拍得住最近鬧出一腳踏N船嘅賤男張致恆（Steven）。
慶祝轉會俄超飲大咗
可能未必有好多球迷識喀麥隆前鋒尼積爾，其實佢喺2012年已經升上法甲球隊里昂一隊，15年8月更加以1,200萬歐元（約1億港元）轉會熱刺。不過喺熱刺嘅第一季機會就真係少得可憐，成季英超都係得八次上陣機會，仲要全部都係後備入替，上陣時間都係184分鐘。結果16年8月佢就被借返去法甲馬賽，前兩季都好地地，但上季又變成大後備，終於喺今年轉會市場被俄超嘅莫斯科戴拿模用500萬鎊買走，不過今次出事，又正正同呢單轉會有關。
尼積爾辯稱睇新聞撳錯掣
話說上個星期尼積爾知道自己有球會要，簽到一份新合約之後，佢就非常開心，所以就去咗慶祝。當然不外乎都係同朋友狂飲酒癲番晚。點知佢個夜晚又真係夠晒癲，事關佢打開社交媒體Snapchat開直播，點知一開竟然係佢同女伴喺床上「大戰」嘅畫面。段片影到尼積爾個樣迷迷地咁，睇嚟都已經飲咗唔少。雖然之後尼積爾已經刪咗段片，但呢場直播已經吸引到成千人睇，家下仲已經俾網友back up咗放上啲短片網站。
事件爆出咗之後，尼積爾就接受法國傳媒嘅訪問，首先佢當然為自己直播閨房之樂而道歉，不過究竟點解會開咗直播呢？呢位25歲前鋒嘅答案就認真過癮，「我嗰陣真係飲得太醉喇，其實我係因為太開心簽咗新球會，所以想拎部電話睇吓傳媒點寫，不過撳錯掣所以就開咗直播。」雖然好難理解大戰當前，點解尼積爾仲會有心情睇新聞，但係呢個故事都係教訓我哋飲到咁醉嗰陣，就千祈唔好一心二用。希望尼積爾去到俄羅斯，可以專心番喺足球上面，每件事都可以認真咁做喇！
球星鹹濕屢見不鮮
【2000年】
英格蘭國腳林柏特、里奧費迪南，同埋戴亞為咗慶祝英格蘭喺歐國盃1:0擊敗德國，召妓上酒店狂歡被偷拍。
【2015年2月】
熱刺中場迪利亞里一段被女子口交嘅片段流出，嗰段片本身就放喺雲端硬碟，不過有黑客下載咗就公諸於世。
【2015年5月】
李斯特城球員占士皮雅臣、湯賀柏同阿當史密夫喺泰國出席推廣活動期間涉嫌嫖妓同埋種族歧視，片段更擺上網，三人即時被李城炒魷。