【本報訊】八號風球期間，多數市民回家暫避風雨之際，多名市民卻無懼風雨，繼續在大埔連儂隧道留守；甚至有婆婆陪同孫仔到場守護。他們手挽手，為防牆上市民表達意見的便利貼遭受風雨吹殘。
傍晚開始一直留守
大埔連儂隧道貼滿市民表達意見的便利貼，隧道入口掛有「香港人加油」的橫額。昨傍晚6時許，隧道僅有寥寥街坊經過，但仍有數名熱心市民一直在場留守。有婆婆更陪同孫仔到場守護牆上的memo紙。其中一名「看守人」向《蘋果》表示，自6.9以來至今近兩個月，大埔連儂隧道已貼滿大大小小的memo紙，因為擔心熱帶風暴「韋帕」吹襲會令大家的心意付諸流水，故在場守護。當發現有損毀，可以即時補救。
「我哋落咗嚟都經歷咗一段好長時間，經歷過（連儂牆）俾人摧毀，又經歷過俾警察撕紙，但每一次俾人破壞，都見到其他居民好齊心咁整返好，所以打風都希望保護到呢度，唔好俾風吹雨打到爛晒」。他形容整條隧道已變成藝術品，又指自己在打風時繼續留守隧道只是盡點綿力，「都會有街坊落嚟睇吓，我哋都想盡少少力，睇吓佢哋（街坊）有冇啲咩工具要用」。
■記者馬耀文