《蘋果》又攞獎啦！消委會、記協同攝記協合辦嘅第19屆消費權益新聞報道獎，噚日舉行頒獎典禮，《蘋果》女攝記王心義（Esther、圖）憑住一張關於反對買賣魚翅請願行動嘅靚相，勇奪兩個大獎，包括新聞攝影組別金獎，同埋「可持續消費新聞獎」攝影組別獎項。成個比賽有274份參賽作品，只有其中28份獲獎，要同時得到兩項殊榮真係唔容易㗎！
張靚相入面有五個小朋友，着住鯊魚衫同抱住鯊魚公仔，其中一個女仔用好溫柔嘅眼神望住鏡頭。八方問過Esther，佢好謙虛咁話，影呢張相嘅時候其實冇諗太多，只係覺得班小朋友眼神好真摯，就決定影低，拎到獎係意料之外。Esther仲話，買賣魚翅係一個好值得大家關心嘅議題，希望大家可以聽吓班小朋友嘅訴求，「沒有買賣，就沒有殺害」。