國際社會差不多一面倒撐反送中、同情抗爭示威者，搞到北京冇晒面，外交部發言人華春瑩前日竟然要拎北韓官方《勞動新聞》評論香港撐場，大讚講得好，點知轉頭又俾人抽秤，話北京雙重標準，北韓評論香港又得，美國就係干預內部事務，唔知華大媽係咪因為咁條氣唔順，噚日就喺記者會拎外媒出氣，教佢哋「如何正確採訪香港差人平暴」嘅新聞。
要拍低極端暴力
華大媽話，人有是非觀念，所以叫記者報道香港近期一系列事態時候，個鏡頭唔只要對準警方，仲要對準「那些極端暴力的活動」喎，仲話有更加客觀、全面、準確畫面，先會有客觀、公正結論喎！
不過睇到呢度，八方肯定華大媽冇好認真睇外媒拍嘅片，其實外媒都有對準示威人士同「那些極端暴力的活動」，但「那些極端暴力的活動」九成係差人打示威者，冇乜影到示威者打差人，因為示威者未埋到差人身，一早食晒催淚彈、橡膠彈向後退，仲點暴力？所以華大媽明顯冇認真留意香港情況喇！
李八方