727元朗示威激鬥之後，林鄭月娥到哪裏去了？7月25日，林鄭原定到科學園出席特首施政報告諮詢會，你知啦，林鄭近兩年大力鼓吹科創，政府撥款二百億畀科學園與數碼港，香港又話要與大灣區融合搞創新科技，故此為咗10月份施政報告，林鄭到科學園出席諮詢會，幾順理成章，畢竟科學園有萬幾人返工，以年青IT人為主，特區政府搞科技諮詢，唔去科學園行一行，唔通去深水埗黃金商場咩。
點知林鄭臨時甩底，改由楊偉雄局長及政策創新與統籌辦事處總監馮程淑儀出席，令在場恭候人士大失所望。話時話，馮程淑儀負責嘅甚麼「政策創新與統籌」，成立以來，低調過鬼，市民根本唔知道呢個政府機構做過啲乜，政策創新喎，林鄭幾時有過？
727之後嘅728，林鄭去咗最安全嘅地方，就係「青少年軍夏令營結業典禮」，由董建華、王志民陪同，解放軍駐港部隊司令員陳道祥，外交部駐港特派員公署副特派員宋如安在場鎮住，亦有特區政府司局長出現做佈景板，林鄭有咁多老友護住，梗係好安心，主持結業禮，對一班少年人講：「每一個青少年都是可造之才，只要開放胸襟，懂得欣賞別人的長處，努力相互學習，便能捨短補長，突破個人的局限……」
在北京暗示有機出動解放軍為香港「平亂」的時刻，林鄭乜嘢公開場合都唔去，揀咗去解放軍軍營，不知有何意思？或者係，在眾叛親離之際，解放軍軍營係佢安心之所？乜唔係啫，政府AO、EO、律政司署、醫護人員皆有聯署要求成立獨立調查委員會，民間方面逾千名建築師、知名學者、教授（沈祖堯、袁國勇）、商界牛耳香港總商會、前高官……等等皆有如此要求，但林鄭唯獨害怕警察反對，死都唔肯，難道佢真正服從「槍桿子出政權」呢一套？根據任何非軍事／威權／獨裁政府之原則，文官對軍方、警察有絕對管控權，香港有規矩，警察必須尊敬尊重特首及政務司司長，不能以下犯上，現在香港警察難道以為自己大晒，公然公開威脅辱罵政務司司長？林鄭月娥出自天主教女校及精英大學，想唔到竟是如此橫蠻，專制頑固的一個人，無計無謀，只靠警察，害死香港。林鄭之不辭職下台，或如FT所言，北京不准佢辭職，就是北京要綁住佢在戰車上作為箭靶，受萬箭穿心。在政治上，林鄭已是求生不得，求死不能，都幾可憐，更可憐嘅係香港陪佢陸沉。