旋風式過港，竟然也有禮物收，真是上天眷顧飛來艷福。別怪我恃寵生驕，講完多謝還阿支阿佐，份份厚禮之中，最珍貴的不是甘先生新鮮出爐的《我問人：人問我》簽名本，也不是小思老師第三次修訂的《香港文學散步》，而是一個口罩。星期天下午文化中心越劇《孔雀東南飛》散場後，去附近商場醫肚，孤家寡人求求其其，以簡單快捷為搵食原則，於是三步拼作兩步直踩無印良品。那個鐘數，門外排了十零人，當然打個突，一見夏季大減價正在店鋪進行中，橫又係等掂又係等，點解唔濕下平先，於是埋去睇埋去揀，東摸摸西試試，搞咗大半粒鐘。食飽準備打道回旅館，上網看看遮打花園集會訊息，發現兵分上環銅鑼灣兩路，前者正是我目的地，連忙電聯有經驗的軍師，問問是否應該啟動B計劃。他說情況有啲亂，建議睇多場戲先至過海，我答咁不如去同志桑拿野戰，話唔埋有休班警員搞搞後面，嘻嘻哈哈笑了一輪，又再蹉跎半小時。
九點左右抵達上環站，由永樂街出口上到地面，街頭巷尾盡是黑衣小朋友，尚未辨明東南西北，有個妹妹遞上口罩：「正話放咗催淚彈，唔好行電車路嗰邊。」我說打算行皇后大道，睇怕唔會有事，唔好浪費物資，她答：「唔知幾時再嚟㗎，都係攞住先啦，穩陣啲。」轉身走了兩步，眼淚就忍不住了，田納西威廉斯宣揚的陌生人的慈悲，想不到如此溫柔。再走兩條街，終於感受到火藥威力，然而真捨不得撕開口罩封套，隨便掏出「祝君安好」毛巾掩鼻算數。殘餘空氣都這樣惡頂，食到正滋味如何可想而知，小朋友，辛苦了。