反送中抗爭寫下香港歷史重要一頁，百萬港人全程投入兩個月，有錢出錢，有力出力，但近日就傳出唔少青年抗爭者因每個禮拜都要課金買裝備，搞到幾乎三餐不繼，於是民間就出招要「助養」抗爭者。有人就問八方，點解抗爭者要個個星期入貨，有人仲整咗張大嘥鬼網上改圖，將「惜食咪做大嘥鬼」變「抗爭咪做大嘥鬼」，叫人將啲3200、7502、6006、6400等防具重用，仲話「雖然人嘅安全係首要，但請減少資源浪費！」
用完即棄免遭截查搜袋
睇到呢度，八方就要講吓近排喺抗爭前線採訪聽到嘅心噏故事，實情一班抗爭者唔係唔想將防具重用，但佢哋更驚每次「發夢」放學後，喺回家路上被警察截查搜袋，到時一個口罩就已經「水洗都唔清」，所以為咗繼續打仗，只好忍痛每次扔防具，甚至乎佢哋因為財力有限，寧願入手次一級防具都寧棄勿留，仲未計有時連衫褲鞋襪袋都統統被迫棄埋。
至於嗰堆冧巴，可惜唔係令人發大財嘅股票號碼，而係唔同豬嘴同濾罐型號，組合價由百幾蚊到幾百蚊不等，對催淚煙作用當然同價錢成正比。政權成日話今次運動有外國勢力介入，八方今次就搵到證據啦，因為外國亞馬遜網站呢排防具大特賣，幾乎以五折價發售，肯肯定係支持港人繼續抗爭啦！