上個周末，同創辦人H吹水，佢忽然講起，如果可以將Be Water應用喺商界，就真係真心厲害！點知到咗晚黑，啲市民明明已經Be Water，勢估唔到，仲要俾警察追入西鐵站，打鑊甘。除咗O嘴，我真係冇咩好講。市民如果唔退，相信會更加死傷慘重，Be Water已經發揮功用，把傷害減到最低。
呢兩個月，香港人向全世界展示了一種全新沒有領袖的抗爭模式：Be Water同冇大台。老友高建，創辦咗Likecoin，佢月頭喺立場出文，寫區塊鏈式社會運動，我認為亦解釋了冇大台的商業含意。
高建引述以太坊的創辦人Vitalik Buterin，其對區塊鏈的經典解說，去中心化亦即冇大台的三條主軸：架構、政治、邏輯。傳統企業基本上都有一個總部、一個行政總裁、一種企業文化，三件事同屬中心化，都係中央集權、由上而下方式的組織。
冇大台的重點，不在於沒人領軍，而是即使沒有總部、沒有一位行政總裁，公司組織上下仍能有效運作，仍能取得共識，確立全認同的企業文化、朝着同一方向努力作出貢獻。但實際操作上，組織咁多個體，能力各有不同，點至可以達成共識、群策群力，完成複雜的任務？由高建開發的Likechain讚賞鏈，提出了權益證明（Proof of Stake）機制：量化各成員的貢獻度，並以此作為投票權，去確認每一個共識。當有三分之二以上票支持的方案，就會成為共識，整個生態跟隨。
相反，紀律部隊例如警隊，就是由上而下管治的最典型，上級下達命令，前線不用自己思考，無需用腦，只管嚴格執行命令就得。
呢個六七月，兩種截然不同的勢力交鋒，象徵意義十分巨大。前日國務院記者會嘅重點，係沒有反對成立獨立調查委員會，而我相信，委員會將會由接棒的新特首成立，有份打市民的濫權警員，將喺不久嘅將來被繩之於法。
尹思哲
linkedin.com/in/wanszezit