香港班克警係咁鎮壓示威者，俾西方大國鬧爆，歐洲議會仲建議歐盟各國以後唔好賣防暴器具畀港府，更將矛頭直指北京，敦促北京咪干預香港內政，北京梗係唔高興，係咁話外國干預香港內部事務，但今次反送中搞到咁大件事，克警打人片全球瘋傳，真係冇乜國家出聲撐北京，到噚日終於有外國出聲撐佢，外交部當執到寶，由發言人華春瑩公佈，咁又係邊個國家肯撐？原來係仲差過大陸嘅北韓！
《勞動新聞》尊重中國主權
北韓官方《勞動新聞》日前評論香港問題，話支持中共解決香港事態措施，話唔理乜人都應該尊重中國主權，停止以任何方式干涉香港事務。呢啲立場梗合晒中共口味，外交部發言人華大媽立即喺新聞發佈會，讚賞北韓喺香港問題上發出正義的聲音，之後又係一堆乜嘢不容外國勢力干預，最終邪是壓不了正之類。
忽評香港 金仔夠老友
華大媽當執到寶，但網民笑到收唔到口，有網民話中國成日話自己係大國，原來冇朋友到搵個北韓去撐香港政策，真係影衰自己，又有人話北韓官方以往冇講香港嘢，忽然官方《勞動新聞》評論香港，係咪中共見冇國家撐佢，叫金仔整篇社論撐吓場，咪等中共咁樣衰？
李八方