比林鄭月娥一子錯滿盤皆落索「叛港送中」極可能引發下一波大規模移民潮之前，繼四年前「佔中」引發 unfriend割席潮再次淹來，迅速蔓延。
「住喺元朗幾十年，竟然話冇見過黑社會打鬥？假成咁，點同佢做朋友落去呀？」
為民請命、性情剛烈一片黃花開遍。黃醫生跟佢個friend係咁呻。佢個friend回應：「唓！元朗居民黑社會一家親，點會打鬥啫？」
危牆之下，死都唔發聲，同黃醫生幾廿年朋友竟然咁好運，間歇性失憶忘記咗我係元朗人，不單止，更係罪加三等嘅原居民。其實我都好想透露；兄弟姊妹為財失義、貧賤夫妻百事哀、一王三后東宮西宮中宮呷醋中毒……而大打出手經常發生睇到瞌眼瞓，跟一般後來元朗人至大不同，出生之前幾廿代一直元朗為根（縱使有人涼血指證我們曾因滿清初年被迫「遷界」曾經向內地離開過而誣衊並非世代住在這裏；Come On，那時康熙年間，距今快三百年，而原居民之名並非我們自己的稱謂，跟「新界」二字相同，原由英國 120年前租借日起，原中國地圖多了一欄「新界」，族群多了新名稱「原居民」），體內血液百分之三百元朗血；然而，黑社會開片打鬥就聽得多，不幸仍未親眼見過。
死命保持沉默，清楚稍微開聲；黃醫生與我積累幾廿年友誼，以他秋瑾過抽筋嘅剛烈，即時凍過水，乜friend都冇得做，立刻割席！
黃醫生少時家住黃大仙，會否跟慈雲山、九龍城、大窩口等等社團團員培植所的居民刀光劍影狗血豬紅中成長呢？如果問佢，會否認為我借題發揮，犯影射罪呢？
有人WhatsApp問我：喂你同高慧然好fan個呵？好心你就同佢割席啦，黃屍上身㗎佢，成班人簡直喪屍，去到邊咬到邊，一不小心被咬，即成喪屍，點做得朋友㗎？
「葉德嫻都識㗎，我！同高志森、超人夫婦都係幾廿年朋友，肥佬黎仲出緊我份糧，咁點辦先？高導演唔訓你猶自可，撩起佢把火，鬧起啲衰人上嚟點會癲唔過慧然BB……」
朋友，和而不同；大條道理，通識課冇教咩？
面對網上網下眾多朋友，黑嘅、白嘅、彩虹嘅，自己打自己，左割席右割席實情無謂到極；6+3=9，5+4=9，8+1一樣等於9，不理那一種加法，甚至減法、乘法、除法；重要是結果都是9，如果9是真理！