跟鄧渭然出動滅蝨，他一見記者輕鬆腳踏涼鞋，就說今次和味，只因繁殖力超強的床蝨肆虐，最愛吸血咬人，所以每次深入「災區」，他都全身包到實如臨大敵。除只露出一雙眼，穿上密封白色保護衣前，還先全身噴上防蝨水，褲腳用橡筋重重綑綁。35度高溫，未開始捉蝨，早全身濕透。目標單位在深水埗富昌邨，小小公屋單位住上88歲的伍安培和小四歲的太太，還有60歲患長期病做清潔工的兒子。兩代三老，加上鄧渭然和Uncle Tom，老人救老人，一屋人幾百歲。
「呢度唔算差，去過啲劏房，雜物多到行唔入，可能係阿仔做清潔，唔知邊度惹到啲蝨入屋」。手拿十幾磅滅蝨槍的鄧老，邊說邊手沒停。兩張碌架床，上格放滿衣服雜物，兩老睡下鋪，新老兒子就睡地下。甫掀開竹蓆，即見黑色像芝麻大小的木蝨星羅棋佈，一幅牆血迹斑斑，都是打蝨的血痕，還有衣櫃木凳底，統統是重災區。「呢排天氣轉熱最磨人，一到夜晚啲蝨就出晒嚟開餐，成個枕頭都係，咬到條頸紅晒……」穿着白色背心汗衣的伍安培說。
透過社區組織樂心會輾轉聯絡上鄧渭然，伍伯說最大願望是「有覺好瞓」。類似的個案，在基層社區其實並不罕見，中大社工系年前一項調查就指，有劏房戶受蝨患所困，寧願露宿街頭，自言與蝨有緣的鄧渭然就說：「手頭個案有幾十個，都係透過社工轉介，我哋年紀又大，根本做唔切，所以近年都寧願做多啲講座，教育啲人唔好亂咁執嘢返屋企，唔係清潔完好快又有。」遇過一屋紙皮報紙雜物，長期只能坐着睡的獨居長者；還有滿屋木蝨轟炸致失眠，最終出現幻聽的精神病人，鄧直言這些都是社會上最邊緣的人。
鼓勵更多後生加入
「我做開義工幫啲老人家裝修，有次有個社工問我，話可唔可以幫手滅吓蝨，去到佢唔敢入屋，係有啲嬲，你叫我嚟做咩自己唔入去？後來先知好多人根本無咁嘅知識，好驚，怕惹到自己屋企都有，佢哋又要成日家訪，傳開仲死，所以送飯嘅，送到門口放低唔敢入；日間暫託又唔敢收，呢班人就更加被孤立」。本身開寢室用品公司的他，兩年前自資成立「滅蟲滅蝨特攻隊」，是本港首支義助貧老滅蝨的民間組織，他說是拋磚引玉。
「講真我同Uncle Tom都七老八十，做唔得幾多，最希望係訓練到社工，多啲後生嘅加入」。有所謂越窮越見鬼，鄧渭然深信不疑。「唔係窮，都唔會執咁多嘢返屋企，惹到一屋蝨」。出身貧苦的他，對此有深刻體會：「細個住大角嘴啲板間房，喺街邊執皮紙垃圾，每晚瞓覺都要捉蝨，用滾水燙用腳踩」。自小習慣與蟲蝨為伍，80年代移民到楓葉國，他說一樣與蝨有緣，「去到加拿大，冬天零下幾十度，因為室內好多木傢俬，原來一樣有木蝨」。