【本報訊】香港落入如斯境地，身為建制派的詹培忠坦言，回歸最初時西環仍會聆聽議員意見，但後來他們「自以為在港很久」，已夠了解香港事務，就自我作主。
批評董建華「假忠直」
詹培忠98年當選立法會議員，同年因偽造文書罪入獄，99年出獄。法例禁止他五年內參選立法會議員，限期一滿他馬上參選，成為香港第一個坐監後再當選的立法會議員。他04年再次當選立法會議員至2012年，見盡政壇醜惡。他指97年前董建華已是內定特首人選，但當年對方否認，批評他「假忠直」，「我話董生，入面（中央）就嚟畀你做特首。佢話詹生你唔好諗，我哋睇下第三個（其他人選）邊個最適合。」
他指董建華曾向中聯辦告狀，阻撓他當選議員，「因為我判刑前，董生問判咗未呀？我話未，佢話無事嫁你。最終我要坐監，佢覺得得罪咗我，覺得我有仇必報，好麻煩。」
到2010年，另一特首曾蔭權第二次推政改，將特首選舉委員由800人增至1,200人，立法會增加5個直選、5個功能組別議席。這方案遭泛民反對，並提出改良方案「一人兩票」，成為今日的超級區議會議席。當時有報道指，這又遇到中央阻力。詹培忠憶述：「我同曾蔭權講，你同廖暉（時任港澳工作協調小組副組長）講聲，基本法寫明要循序漸進。曾蔭權話：詹叔，習（習近平）都唔畀啦。我話唔係，你照講要按步就班。最後曾蔭權打畀我，話阿爺接受咗意見。」
2016年詹培忠曾再出來參選立法會議員，但因輕微中風及腳痛，多次缺席論壇，最終落敗。他批評今日的議員，並沒有為港人反聲，「現在嘅係政傑，識時務者為俊傑，政治嘅傑出者，看風使舵。」