港澳辦昨日開記者會，一如所料撐林鄭、撐警方執法、批評示威者令香港國際金融中心地位受損。不過在「金牌莊家」詹培忠眼中，「國際金融中心」只是一種吹噓、現只是中資的小圈子遊戲，普羅港人沒有賺大錢的機會。面對撕裂的香港，詹培忠透露，有意下年參加立法會金融服務界別選舉，並落力發聲。
記者：孫樂祈
詹培忠本月初重開網台品評時政，他笑說自己是個耐不得寂寞的人，開台與參選無關。不過他不否定參選的可能，「我個仔（詹劍崙）選，我就無理由爭。如果佢唔選我會出來，直選就唔會啦，香港轉得太快，出嚟都係做炮灰。我認為年紀唔代表咩（現年72歲），係你嘅力量能否適應你嘅工作。」現時的金融服務界別立法會議員張華峰，上年曾指如無意外、不會再競選連任。
中資或佔上市公司九成
轉得快的，不只是政治氣候，香港金融系統亦已大換血。打滾股壇多年的「金牌莊家」詹培忠說：「國際金融中心，其實係自己吹噓出嚟，林鄭夠話好打得。以前香港有外資、華資、中資、小型經紀，都覺得呢個行業欣欣向榮，現在中資一支獨大；以前全民皆股，現在小市民好似唔關心，只係小撮人玩意。」
他形容外資大量生意早已被中資搶掉，港資經紀往日佔交易所約兩成成交，「現在只有3%至5%，大陸有御用券商，直情係國營。」而本地銀行如永隆、大新、大生等亦式微或遭中資收購，「仲有一間大有銀行，佢無對外營業，真係無啦，都被收購晒。」
昔日做不少「踩界刁」
雖然環境使然，中資必定主導金融市場，他估計將來九成上市公司皆為中資股，但金融中心的制度，仍全憑香港監管機構維繫。「潮州怒漢」詹培忠火氣已不比當年，不過仍有牢騷，他提醒證監當初「披露為本」的原則，「大陸公司咁多係睇唔晒，應該修改法例。如果申報資料報錯，就判刑事罪，要坐五年，咁上市公司咪特別小心去睇囉。」同時要公開、公平、公正去保障投資者利益，「好多人係報紙寫股票要聲明有冇買，但點解批評邊隻股唔得，佢自己仲可以沽空呢，又點公平?」
今日指點證監會，但詹培忠昔日也做過不少「踩界刁」，他形容曾為立法會議員的自己亦兵亦賊。他早於72年為父親的經紀行穿起「遠東190」的紅衫仔，其時只是芸芸股民之一，已馬上利用灰色地帶，他說是剩餘權利，「李福兆在菲律賓引進菲立斯礦務，當時每股0.4元上市，炒到上1.6元好多人追，我覺得佢唔值，菲律賓個大老細已經出緊貨，我就提議公司，人客話買，就話幫佢買咗，其實無買到。結果上到兩蚊後就插落1.3元，第二日跌破一蚊。我諗幫公司賺咗50萬。公司好識做，獎咗五萬蚊畀我。」
香港六、七十年代工業、地產發展迅速，很多紡織、原子粒（電晶體）、塑膠用品等股票上市，加上內地因文革、馬來西亞排華等，人才與資金從各方湧入香港，造就金融市場的蓬勃。今日中資攻港，詹培忠看得淡然，「呢個世界一雞死一雞鳴，一個出去，一個就嚟，人人都係過客。香港不會困着香港人，唔使擔心。」
