利物浦季前熱身賽戰績認真麻麻，之前美國之旅三戰都冇贏過，周日返到英國友賽諗住會好啲啦，點知同意甲拿玻里交手慘敗0:3，近4場熱身賽1和3負，仲要每場都失2至3球。
喺今夏話走但最後決定留低嘅米洛列特，趁主力門將艾利臣比加未歸隊有唔少上陣機會，喺最近四場熱身賽都有上陣，其中三場仲以正選把關，不過表現就唔算太好。佢喺輸畀拿玻里場波雖然冇再出現「牛油手」，但表現依然唔多令人滿意。不過紅軍球迷唔使太擔心，上季英超金手套得主艾利臣同另一巴西兵羅拔圖法明奴，加埋埃及前鋒穆罕默德沙拿，三大主力喺周一歸隊，有機會喺剩番一場嘅熱身賽或者周日對曼城嘅社區盾候命。
對拿玻里又輸0:3
紅軍周日喺英國愛丁堡對安察洛堤領軍嘅拿玻里，中後場依然有華基爾雲迪積克同佐敦軒達臣等主力，但喺17分鐘都係先失守，拿玻里喺左路策動攻勢，恩斯治尼長驅直進到禁區頂妙射開紀錄。29分鐘，又係恩斯治尼喺左路搞搞震，傳入禁區由米利克接應窄位射遠柱得手，將比數擴大到2:0。紅軍之後有韋拿杜姆食詐糊，換邊後到52分鐘就再失1球，恩斯治尼再喺左路進擊，推入禁區施射，米洛列特撲出不遠，個波省中回防嘅安德魯羅拔臣，益咗艾文尤尼斯喺門前建功。米洛列特喺上周三2:2賽和士砵亭嗰場接波甩手結果彈入，今場雖然未至於咁難睇，但整體演出都幾難令紅軍投佢信心一票。
艾利臣回歸放心晒
艾利臣同法明奴喺今夏代表巴西國家隊出戰美洲盃，一路踢到今個月七號決賽仲贏埋冠軍；沙拿就代表埃及參加非洲國家盃，雖然呢支東道主喺16強就出局，但都只係比巴西幫早一日放假，仲有踢到非國盃決賽嘅沙迪奧文尼，一班主力都獲延長假期，其中前三者就已經喺周一歸隊。紅軍喺周三會踢埋最後一場季前熱身賽，去瑞士同法甲里昂交手，之後就等到下周日同曼城爭社區盾。雖然季前熱身賽戰績一般，但領隊高路普就唔擔心︰「少咗六個球員係有問題。不過向好嗰方面諗，咁樣曼城根本冇辦法評估到我哋同佢交手時嘅陣容。」
