香港社會撕裂，人所共知。老少有鴻溝，比撕裂可能更加厲害，因為中年老年人之間，若有政見不同，但要各自搵食，唔想得罪人，識諗者自動忍讓便是，費事老友反目成仇，或者與客戶鬧交也。但如有老少代溝，屬同一家庭，父母與子女不和，就大件事。好似蘋果報導，沙田有男仔與家人政見不同，被趕出家門，憤而跳樓，誠屬香港悲劇，人間慘事。
7月24日晨早有網民呼籲逼爆金鐘地鐵站，抗議港鐵處理元朗西鐵站嘅打人事件（注意：係打人事件，並非警方所講之打鬥事件）不善。左丁山就唔同意搞港鐵嘞，早上繁忙時間逼爆金鐘，阻人返工，引起市民不滿，實在係失民意行動，智者所不為，倒不如搵律師向港鐵索償，由法庭處理更好。當日有電視台訪問金鐘站地鐵乘客，一位中年男人講：「阻人返工，豈有此理。」一位年青少女就話：「係阻住晒呀！不過我係怪林鄭月娥搞成咁，佢漠視民意。」
兩者反應不同，當然就係代溝，今天之年青人與話事建制派徹底割裂。世姪女M係地產界中層人員，與男朋友拍拖十年先至敢結婚，是否生育兒女，還在考慮。呢位世姪女M搵左丁山訴苦：「世伯，我阿爸係陳健波一派，成日鬧我哋搞壞香港，搞壞佢哋嘅收成期，我老細係測量師，與阿爸同樣意見。上日佢對我哋班下屬訓話，講有機會就要送仔女去英國讀書，唔好等佢哋畀香港通識教育教壞及同學帶壞，要畀仔女見識世界，唔好在本港學校做井底蛙。我哋真係聽到頂唔順，又唔敢頂嘴，好悶呀，世伯，你話點好！」問世姪女M點解搵左丁山傾呢啲嘢？M女話：「阿爸講咗，原來你就係左丁山，於是開始睇你專欄，發覺你嘅見解同阿爸唔同喎！」哎呀！咁咪即係代老友教女，仲係教壞佢嗰隻，分分鐘佢阿爸會同左丁山絕交㖭！於是同佢「洗腦」：「你阿爸經過老虎岩獅子山時代……」M女問：「乜嘢叫做老虎岩？」啊，唔識㖭！講番老虎岩即係樂富，然後再講：「捱到今日有所成，梗係唔想香港經濟受損，你阿爸同你老細都靠內地客發達，於是親中，此亦人之常情。但佢哋對國家不得反抗，反對，妄議，人與豬無異，對豬純講飼料，對人就要講埋天地有正氣，明白冇？父母就是父母，盡量唔好同阿爸鬧交啦！」M女幾乎流出眼淚，世伯冇符。