一班立法會秘書處職員繼早前打破沉默，發聲明力促政府正面回應市民五大訴求，並停止打壓和平示威以及散佈白色恐怖後，原來上周五仲喺立法會一部電梯內發起「立法會秘書處連儂牆」，希望可以畀職員貼上感想，令其他同事知道秘書處職員都有發聲權利。
職員再貼 數分鐘被搣走
有相信係秘書處職員嘅網友噚日就留言，話呢幅連儂牆上周五已經迅速被搣走，噚日有同事重新貼過，但幾分鐘後即再被移除，令佢質疑：「難道（立法會秘書長）陳維安真的容不下少少的聲音？」八方噚日望過立法會供秘書處職員使用嘅電梯，唔見上述連儂牆蹤影，咁八方就梗係問立法會秘書處，究竟邊個決定移除呢幅連儂牆呢？發言人話喎，立法會大樓嘅公用範圍，一直以來都唔容許個別人士張貼通告或海報，所以秘書處會將該等標貼移除。八方睇完呢個回覆，即係秘書處拆牆係跟足規矩做，但又咁講，現在全港各區連儂牆，其實好多唔可以貼嘢，但食環署唔會話按規矩搵清潔工友去拆，只會得班藍絲半夜帶隊去拆牆。連公務員、AO都要企出嚟發聲，立會秘書處就話要拆牆滅聲，真係令人覺得陳維安如果唔去做林鄭嘅官，真係浪費呀！
李八方