馮德倫近年在美國發展，繼監製美劇《荒原》（Into The Badlands）之後，再為美劇《五行刺客》（Wu Assassins）擔任導演，負責頭兩集。今年44歲的他，入行已經超過20年，自爆已有老花的他，坦言漸感到生命不是永恒。
馮德倫早前在柴灣接受本報訪問，講到今次為《五行刺客》打頭陣，他說：「由我開始拍套劇，要畀多啲時間做準備。由你開始，往後嘅導演，就會跟住你個tone去拍，比較大壓力。」今次拍攝以實打為主，馮德倫自言都頗暴力，幸好在Netflix平台播出，尺度會較大。
保留剪報
一向喜歡武術，視李小龍為偶像，對動作片更是情有獨鍾，馮德倫說：「主要嚟講我導演嘅戲，鍾意有動感，但唔一定係武術，好似追車、跳舞、槍戰都係動感，我覺得港產片，就係有呢種動感。」談到拍美劇與拍港片的分別，他說︰「喺香港同內地導演話事會多啲，但喺美國以監製或studio嘅阿頭為主，因為佢哋要睇整體，你會受控多啲。」
受訪當日，馮德倫專誠帶來三本於87年、當年13歲時做的電影筆記到場，打開重看自己的傑作時，他一臉興奮說：「87年我13歲，對電影好有興趣，自己睇完啲戲會做記錄，好似影評咁畀分，做功課都冇咁好心機。」在筆記中，他看完港產片《英雄本色II》後，有心機地剪貼該片的報紙廣告，並寫下90分。兒時為周潤發和劉德華影迷的他，希望未來有機會帶着這本movie report給兩人簽名。
已有老花
年紀漸長的馮德倫，自言最大分別是感到身體起了變化，他笑說：「過咗40歲真係好明顯，生命唔係永恒。好似朝早起身攞電話睇，發覺越嚟越拉得遠。有次我問Daniel（吳彥祖），佢睇啲字要拉幾遠，原來佢拉得遠過我少少，咁我都開心啲。」平日都有做運動，他自言學懂花時間保護自己。至於太太舒淇的強項打羽毛球，馮德倫就反而稱不懂。
採訪︰羅婉玲
攝影︰沈健程
化妝︰Hetty Kwong
髮型︰Carr Cheng of number 8