反修例運動後，網民自發嘅行動可謂遍地開花，由香港蔓延到全球，只為引起國際關注。日本現正舉行「Fuji Rock Festival」音樂節，場內留言板變成港人嘅連儂牆，板上貼有七彩便箋紙，上面寫住「遍地開花」、「香港人加油，休息完返去再嚟過」等打氣說話，亦有唔少用日語或英語設計嘅標語同海報，解釋反送中事件、元朗暴力襲擊事件，同警察濫權等問題，務求令赴音樂節嘅當地人同旅客，可以更全面理解發生於香港嘅呢場逆權運動，令場外場內充滿住搖滾精神！
反送中巴士遊倫敦地標
而連登巴打「我要攬炒」喺英國再發功，於倫敦舉辦「倫敦快閃泊紅巴行動」，佢租咗架紅色雙層巴士，喺車上掛起兩排寫有「Will Britain Hold China To Its Promise On Hong Kong's Freedom？」黃色長標語，希望能吸引英國媒體報道，等大眾注意《中英聯合聲明》被毀，架巴士將於英國時間中午12點15分、即係香港時間晚上7點15分由中國大使館外出發，途經多個倫敦熱門地標，包括倫敦眼、國會大廈等，今次「倫敦快閃泊紅巴行動」，主要係向英國市民派發傳單宣傳《中英聯合聲明》行動，亦會「突擊」香港經濟貿易辦事處（海外）係Leicester Square舉辦嘅電影放映會，攬炒巴期望今次活動能夠爭取英國媒體報道、英國人參與聯署，增加輿論壓力。