上次大批市民去西環中聯辦示威，有示威者用黑油同雞蛋掟向中聯辦大樓外嘅國徽，北京、港府同西環自然嬲到震，大鬧觸碰一國底線，西環第二日立即換個新國徽，中聯辦主任王志民仲見記者，講埋晒咩「莊嚴的國徽仍然高高地懸掛着中聯辦大樓」，好似冇有怕！但噚日西環面對第二次衝擊，竟然搵個膠框包住個國徽，但最冇面係網民恥笑西環將個國徽放入玻璃棺材，真係大吉利是！
被嘲「壽終正寢」
西環用個大膠框包住國徽相一出，即刻有網民摷出一張毛主席瞓水晶棺材、一班領導人圍住悼念佢嘅舊相放埋一齊做對照，話毛主席死咗就話放入透明棺材，國徽又放入「膠棺材」，咁樣咒自己個國家「壽終正寢」，呢個係乜玩法？而且西環外已放晒水馬，就算示威者再想用雞蛋同黑油嚟弄污國徽，咁遠都好難中，西環使唔使怕死成咁？
有政圈好事之徒話，西環炒樓以億億聲計，大可做到一千幾百個國徽，示威者即使掟污糟國徽都可以即刻換走，甚至掟一換十都得，使乜將國徽入棺畀人瞻仰咁大吉利是？咁樣怕咗示威者，你叫一眾支持情何以堪？話強國玻璃心一啲都冇講錯！
李八方