張致恒（Steven）日前公告已為人父，與粉絲雯雯奉子成婚，但被爆出一腳踏五船，眾女群起圍剿賤男，踢爆他欠錢、講大話及玩女惡行，蔡卓妍（阿Sa）昨日就取消關注Steven的Ig，與他割席，舊愛傅珮嘉罕有在Ig放閃，貼出與台灣老公周思甫十年前的婚照。Steven的偷食檔案越揭越多，有雜誌指他與莊端兒拍拖四年間，曾偷嗒無綫小花蔣家旻和失婚裕美，蔣家旻誤做「小三」更傷心到曾有自殺念頭。
過夜血染床單
裕美三年前仍是人妻時與黃子恆三角關係曝光，有家歸不得，傳暫居狄以達的九龍灣公司，但遇着冇水沖涼，Steven就趁當時的女友莊端兒離港工作，邀裕美返屋企沖涼兼過夜，卻遇着裕美生理周期搞到血染床單，事後莊端兒發現嬲到震。《蘋果》昨日問到幾位當事人，莊端兒沒有否認：「我知道件事，但已經過咗去唔想再講。」蔣家旻說：「真係唔係事實，同佢唔熟，只係合作過兩次，冇拍過拖。」
裕美表示與Steven相識已久，情如兄妹，經常一齊去傳福音和做見證：「我希望端兒唔好誤會啦，我性格唔會話識咗好耐先同佢有嘢或鍾意。」裕美表示Steven曾向她透露感情事煩惱：「佢又靚靚仔仔，又係mix，講嘢又叻，又識𠱁女仔，好多女仔埋身，佢又抵擋唔住，但覺得可以處理得好好多。」Steven的未婚妻雯雯也被爆是「追星界」媾仔能手，曾與Supper Moment成員Sunny拍拖，又主動向關楚耀投懷送抱。
Kenny冇嬲兄弟
此外，關智斌（Kenny）前晚由泰國返港，他談到遭Steven所累紅館夢碎，指有與Steven保持聯絡及向他道歉：「佢同我交代咗件事，講咗點解中途離開咗個trip，佢講完我都理解。」Kenny表示沒有嬲兄弟，但對於紅館騷被迫擱置感無奈：「可能係上天嘅安排啦，因為開呢個騷其實都係一個好奇怪嘅安排。」對於Steven向女友借錢，問到可知對方有經濟問題，有否向他求助，Kenny說：「佢又冇特別同我講喎，咁多年前嘅嘢，我唔記得喇，有時我借畀佢，有時佢借畀我，呢啲嘢冇計嘅。」
採訪：王連連、嵐山
攝影：陳俊強
