我一身的黑少說也已超越前九七，怎會隨便話甩就甩？
7.27前數天，收到的WhatsApp泰半……
兄弟：快快購置幾件顏色衣服……
大佬：灰色；轉少少，着灰啦……
智叔：唔換淺色衫都得，唔該留喺屋企萬勿出門……
老友：你唔會真係冇其他顏色衫啩？
事實除咗黑色之外，唔係冇，大吉利是用作我們唐人喪禮，幾件白色衫常備免不了；不過行街黑衣人數量大好多喎，為勢所迫，避難着幾日白衫，俾黑衣人撞正，招打仲大劑，人更多、勢更眾，一人一隻手指尾都被撳死啦！
普羅大眾着衫只為傳統禮數，避免赤身露體。然而為數不少一撮人面對衣服卻是一份膜拜，一種宗教。
一些廟宇、教堂、清真寺極盡金碧輝煌例如寶蓮寺、西班牙Sevilla大教堂、Casablanca海邊大清真寺。另一些則是慈山寺、翡冷翠Santo Spirito、嚤囉廟街嚤囉廟；極盡低調、安靜。知我者或時多嘴：幾廿年見來見去，閣下就這幾套黑衣裳……啊，那也是一種宗教；西貢赤徑聖家小教堂。
就不算多，過去總備幾件傍身，從Helmut Lang、Ann Demeulemeester、Prada、Commes des Garcons、Yohji Yamamoto到Giordano到「例外」到全副生活所需幾乎Uniqlo；早已習慣黑漆漆如魚得水。曾經上電視參與清談節目，監製話：都唔好黑得咁過份，阿邊個邊個去服裝間，幫鄧生揀過另一件衫，唔好全黑，尊重嘉賓搵件靠近黑。
PA姐姐迅速找出深灰色衛衣讓我替換，以為OK。誰知拍攝一小段，看效果，過不了自己雙眼；導演、導演，呢個着灰色衫嘅乜水點會係我？
導演無奈，只好讓我換回一身黑色重拍。
7.22那個星期開始，弟婦閒談告知；從村子裏到鎮上，忽爾變了色，路上閒人將黑色、白色衣裳換上一身五顏六色彩虹顏色；預告本來着乜色都似嘔色的街頭，變得鮮明亮麗，與黑共白都割席！