香港受傷了，哭了，憤怒了，因為愛，我們成長！梁詠琪2011年結婚，之後生女，轉過人生B面，變成妻子與媽咪，沒有停下。今年簽約環球唱片出新歌，參演導盲犬電影《小Q》，為童裝品牌籌備新店，二十多年前的灰姑娘，繼續成長，改以另一個更好的步伐前進，「𠵱家呢個階段，係好講人生智慧，我當然都係學習中。Spiritual growth係好重要，表面上我哋係做緊生意，表面上我哋係幫個女決定緊學校，表面上我哋係點點點，但實際上嘅成長，係內心嘅成長。」
撰文：林妙萍
攝影：周樂恒
「我屋企有一隻狗Luna，佢𠵱家七歲，佢都係混血兒嚟㗎，哈哈哈哈！」梁詠琪參演導盲犬電影《小Q》，勾起從小和狗狗的美好回憶。「爸爸係做測量師，起地鐵，成日去啲地盤度，起完一個站，地鐵就撤，嗰度有啲看門狗，佢就拎咗一隻返嚟，就變咗我第一隻狗，都係一個混血兒嚟，叫啡仔，因為佢係啡色。」
女兒學懂保護
從此和汪星人結下不解緣，家中Luna也陪住女兒Sofia成長，梁詠琪說：「Sofia𠵱家四歲，開始同屋企隻狗建立咗一種好微妙嘅關係。佢會好似照顧一個一齊長大嘅朋友仔咁，食飯會諗狗狗想唔想食，會餵佢食蘋果。喺公園玩時，狗狗又會保護佢，佢哋彼此建立咗一種信任，父母可以step back。」
小孩成長，梁詠琪也一樣，今年簽新公司出新歌《再見灰姑娘》，不再是年輕偶像，身份進化，「新歌好似一個橋樑咁，我好似係一個無形中聯繫住好多人嘅一個人咁，過咗咁多年，我同歌迷之間好似朋友咁。」由當年少男少女追星，跟她一樣變了媽咪，「佢哋支持我嘅方式又唔同咗，『我帶住個女返學，嚟唔到你演唱會』、『我個仔要考試』，我覺得唔緊要，每個人唔同階段要專注嘅嘢唔同，不能百分百focus喺你身上、喺追星身上，係正常嘅。」
和平討論最好
2011年，梁詠琪與西班牙籍老公Sergio結婚，代理西班牙童裝品牌Nanos。兩公婆做生意很易嘈交，有否試過？她說：「始終大家成長背景唔同，當然會有唔同意見，但就冇拗撬，有分歧係正常，每個人睇法會唔同。其實嗌交講嘅嘢，同你討論講嘅嘢，內容其實可能一樣，咁點解唔採用另一個和平啲嘅方法？只要大家目標係一致，兩夫婦共同學習、共同去面對，就有新領悟。」一齊學，一齊討論，有時老公的common sense可能比她更簡單直接，梁詠琪說：「𠵱家呢個階段，係好講人生智慧，我當然都係學習中。Spiritual growth係好重要，表面上我哋係做緊生意，表面上我哋係幫個女決定緊學校，表面上我哋係點點點，但實際上嘅成長，係內心嘅成長。」去年才在銅鑼灣開第一間店，現時又籌備擴充，梁詠琪說：「唔急，係想做到work life balance，同埋大家一齊，喺決定當中明白一啲人生道理，呢個就係最終極，我哋覺得最大嘅收穫。」
造型：楊慧珊
服裝提供：Bottega Veneta 、Chloé、Dior
【年長感性】
43歲的梁詠琪和閨密楊采妮、李心潔成立小黃花教育基金，三姐妹不常見但情常在。楊采妮更因為梁詠琪專程返港客串《小Q》，梁詠琪說：「我哋有一齊做電視節目、一齊charity、一齊出trip，但真係冇一齊拍電影，我希望冇記錯。」
一坐埋三人就講狗仔、講老公仔女，梁詠琪說：「可能做咗媽媽會有更大嘅社會責任，想分享多啲愛同正面價值觀，同埋大家真係容易感性咗、感觸咗，一講到人生課題，關於失去、犧牲、愛，就會想喊。」
更多精采時尚內容，盡在 http://add.appledaily.com。