曼聯上季英超只排第六，冇份踢新季歐聯，今夏轉會窗只係買咗兩個小將丹尼爾占士同雲比沙卡，雖然佢哋仲想買李斯特城中堅哈利馬古尼，但搞咁耐都未成事，原來係李城唔肯等紅魔拎到歐聯資格，先有條件咁畀埋800萬鎊，要求紅魔直接畀足8,000萬鎊（約7.7億港元）先放人，擺明唔信曼聯入得番前四，就連曼聯自己友都唔多信，中場尼曼查馬迪直接話隊波太多小將，要爭標實在唔夠班。
拒絕曼聯七千萬「期票」
隨住艾歷拜利受重傷，而基斯史摩寧、菲爾鍾斯等中堅實力又麻麻，曼聯梗係急住要買中堅，不過轉會窗剩低11日仲未簽到馬古尼，搞咁耐原來係為咗大概800萬鎊轉會費分歧，曼聯提出以7,200萬鎊轉會費買呢位26歲英格蘭國腳，下季拎到歐聯資格或者捧盃就再按條件畀錢。不過李城擺明唔信曼聯，要求一筆過畀晒8,000萬鎊轉會費。
李城上星期六同史篤城友賽，馬古尼繼續有份踢，領隊羅渣士就講明情況冇變過，球隊仲好想馬古尼留低咁話。據悉馬古尼希望加盟曼聯，私底下已經同羅渣士攤牌，但都講明唔會做任何逼球會放人嘅行為。如果呢單轉會成事，馬古尼就會打破華基爾雲迪積克以7,500萬鎊加盟利物浦嘅後衞轉會費世界紀錄。
馬迪：靠後生仔難贏英超
雖然曼聯熱身賽四場贏晒，不過李城唔信曼聯都唔係冇原因嘅，就連曼聯陣中贏過英超嘅30歲中場馬迪都唔多信，皆因領隊蘇斯克查講明新季會重用年輕球員，馬迪就話隊波太缺乏經驗：「質素同經驗會為你帶嚟冠軍，我哋有5至6個頂級球員，但多數都好後生，好似拉舒福特同安東尼馬迪爾咁，能力已經證明晒，不過要領導成隊波就太嫩。」而且，蘇B講明下星期英超首輪鬥車路士，好有機會用17歲嘅前鋒格連活特打正選，馬迪就叫球迷降低一下期望：「格連活特好有潛力，球隊亦都有晒計劃點去培育佢，不過球迷必須要有耐性，畀時間後生仔成長，佢只係得17歲，冇可能期望佢踢出好似26歲嘅成熟表現。」
曼聯家陣仲未確實邊個接任隊長，呢四場熱身賽，馬迪都做過隊長，唔知呢番逆耳忠言後，仲會唔會有得坐正呢？