秀文（Sammi）十三場紅館演唱會前晚圓滿結束，尾場請咗古天樂（古仔）、韓國男團GOT7成員王嘉爾（Jackson）做嘉賓，老公許志安同BIGFOUR兄弟梁漢文、張衞健同蘇永康齊齊撐場。
講安仔遊花園
Sammi對住古仔講：「你知唔知冇你做嘉賓係點？就好似大便冇廁紙，收唔到科。」Sammi準備去後台換衫時，古仔笑笑口話：「我見你條褲，成個籮柚凸晒出嚟咁樣。」之後Sammi分享話：「好多時遇到唔開心、唔順利，聖經呢句說話就會喺我腦裏面，就係『喜樂的心是良藥』。」當唱到新歌《我們都是這樣長大的》時，佢就再次唱到感觸落淚。
完騷後，Sammi邊做訪問邊食薯片、飲香檳，佢話：「好開心，感覺如釋重負，滿意度好高，不過呢一刻攰到不得了，我自己盡晒力。公司問我聽日會唔會加場，佢哋好有信心賣到飛。不過我冇信心做，47歲喇！」又透露之後會同一大班朋友去旅行。
提到安仔喺後台冇上台，Sammi即刻話：「講第二啲嘢啦。」問點解冇唱飲歌《唯獨你是不可取替》？佢話：「我大把歌唱啦，會成日轉歌嘛。」佢又講到覺得自己再成熟咗，人生同思維去到另一階段，不過佢冇講明係邊種經歷，只強調係人生各種經歷。
紋身自我勉勵
對於之前喺舞台上提過「痛過之後，你哋嘅愛情將會變成世界之最」，Sammi解釋：「我唔講呢啲喇！嗰啲對白嚟，我cue緊歌，唔使對號入座。」今次演唱會，Sammi多咗紋身，佢話半年前隻腳完全唔可以跑，就紋咗句「It's time to start something new and trust the magic of beginnings」嚟自我勉勵，而手腕上嘅紅線，就純為貪靚。
撰文：馮仁昭
