月前街上重逢一位多年不見嘅港大教授，交換手機號碼之後，收到佢不少短訊，並非胡亂轉發嗰種，有一啲係趣味性十足嘅半學術性社會議題，跟啲高端人士往來，真係有嘢學到。於是索性搵佢去上海總會吃飯，時值暑假，比較容易搵到佢，教授今年六十歲，貌似五十餘，精神旺盛如小伙子，咁快退休其實係香港大學嘅損失。呢位教授L話：「退休咗嘞，不過又逐年簽番約，大學唔鍾意就可以炒我。」炒乜鬼呀，既精壯，又有料（學術論文也），港大如果唔同佢續年約，私立大學會爭住搵佢，教到七十幾歲都冇問題。
不過教授L話：「我係老派lecturer出身，喜歡畀lecture，冇PPT，齋talk，學生唔like我，我係不受歡迎嘅！」原來如此，以前行英國制，講師真係得過講字，現在行美國制，由助理教授開始，既要教，又要授，用PowerPoint最簡單，對住PPT逐幅圖會講吓數字，時間好易打發，賺份薪水幾容易。反之，對住學生講講講，講到喉都乾，要有實質內容，引經據典，其實好辛苦，但現今學生睇慣YouTube，精神集中時間好短，點有心機聽L教授講一堂吖。
大家吹水之際，手機響起，原來有位公關界靚女E問：「有班評馬人發表聲明，要求馬會撤銷何君堯會員資格，你點睇，我想支持評馬人！」教授L聽見，又話會支持，不過馬會過往慣例，被撤銷會籍人士嘅最常見原因有兩個：（一）犯罪後被法庭判入獄；（二）因財困（好多時係破產諸如此類）而唔交會費一段時間。依家何君堯有錢不在話下，亦有面（尊貴的議員噃），未曾被警方拘控及經法庭審判入罪，馬會好似冇乜理由可以開除何君堯會籍，但民情如此，馬會確係幾難做；勢估唔到元朗黑夜恐襲事件會將兩名聞人搞到幾尷尬，其一係何君堯，一出咗元朗就畀人稱呼；第二位係石鏡泉，被經濟日報集團旗下刊物記者聯署譴責其買藤條水喉通教仔嘅言論，最後要道歉兼被David Webb施壓，閃電辭職，脫離經濟日報最高層。石鏡泉入傳媒之前，係中學老師，唔知佢當年有冇用藤條打慣學生手板呢？左丁山讀小學時就被老師打過，阿媽尤其打得厲害，痛到入心。今時唔同往日咯，在課室藏有藤條已可能被學生／家長檢舉，被教育局警告，估唔到元朗黑夜暴徒真係用藤條打人，鞭鞭入肉。教授L話：「ET三位高層，馮紹波、麥華章、石鏡泉都係我港大師兄，讀書時已是愛國學生領袖，畢業後趁住中國打倒四人幫經濟改革開放，四十幾年來一帆風順，估唔到石Sir七十歲仲咁激啫！」
石鏡泉之藤條教仔論與元朗黑棍打人，令元朗聞名世界，希望唔好在元朗馬路再有藤條燜豬肉啦。