藝人嘅另一半如果都係圈中人，拍拖時會承受一定壓力，尤其係女尊男卑。話說已分手嘅「笑笑」同男友「蛇蛇」，佢哋事業同知名度都差太遠，相戀時已不被外界睇好，但笑笑都紆尊降貴，唔介意男友事業，仲成日鼓勵，不過蛇蛇都係唔夠努力，又冇運，仲越做越霉。
有啲愛情或者可以飲水飽，笑笑仍然好努力去維繫兩個人嘅關係，想盡量將距離拉到最近，無奈蛇蛇個人太冇信心又自卑，佢啲行為有時都幾小家，所以同笑笑啲朋友完全玩唔埋。有時拍拖唔單止係二人世界，點都要身邊朋友接受同祝福，Jessie聽聞蛇蛇陪笑笑參加朋友聚會時，總係做到唔大方，行為又小家，令到笑笑喺朋友面前好失禮。
又試過唔少次，蛇蛇喺笑笑嘅朋友飯局上失言，要女友為佢補鑊過好多次，最後笑笑終於覺得兩個人活喺唔同嘅世界，加上身邊朋友都勸佢唔好再浪費時間，喺一個唔啱自己嘅人身上，笑笑決定斬纜，但係一直冇提過真正分手原因，為蛇蛇留番啲面子。其實蛇蛇份人咁冇自信，無論演出亦擔唔到大旗，人際關係都只能物以類聚，或者三歲定八十，性格真係改唔到。
撰文：Jessie
【姐匙Talk】
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。