上禮拜六國冠盃，兩支西甲班霸皇家馬德里同馬德里體體育會，喺美國新澤西上演馬德里打吡戰。兩隊嘅「天價新兵」齊上陣，首次為馬體會正選披甲嘅新星祖奧菲歷斯開波八分鐘，已貢獻1助攻1入球，半場派皇馬五蛋，相反夏薩特同皇馬依然格格不入，最終馬體會7:3大破皇馬，菲歷斯全場就有1入球2助攻，表現明顯好過夏神。
DC大四喜 皇馬慘負3:7
雖然只係熱身賽，但馬體會踢嚟好認真，開波只係45秒就由迪亞高哥斯達（DC）射門，省中出腳攔截嘅皇馬隊長沙治奧拉莫斯改變方向入網。其後馬體會狂攻，今夏以1.26億歐元（約11.3億港元）加盟嘅菲歷斯8分鐘再入1球，加上安祖哥利亞之後亦入埋波，而DC更半場「戴帽」，遙遙領先5:0入更衣室。
下半場繼續有波入，其中DC又入一球食埋「大四喜」。不過佢65分鐘就因為同丹尼爾卡華積衝突，最後兩個齊齊被逐離場。之後馬體會再有維度路錦上添花，而皇馬臨完場先靠賓施馬同埋小將查維靴南迪斯建功，但仍然慘敗3:7。菲歷斯今場表現身價，入波之餘仲兩度助攻DC，反而夏神冇乜作為，踢咗62分鐘就被換走。
拉莫斯死撐：下半場贏番
今次皇馬大敗，創下國冠盃舉辦10年嚟失波最多紀錄。上次皇馬單場失七球，已係39年前嘅事，1980年同樣喺季前熱身賽，皇馬就曾以1:9遭拜仁慕尼黑大炒，但皇馬隊長拉莫斯仲死雞撐飯蓋，話兩隊比賽心態完全唔同，「對面一開波當場波好似決賽咁踢，但我哋就係踢友賽心態。不過如果只係計下半場嘅話，我哋係贏嘅一方。」皇馬今次嘅熱身賽損兵折將，繼馬高阿辛斯奧受傷可能收咧，今仗再有新兵前鋒盧卡祖域扭傷左腳足踝退下火線。
