吳綺莉跟19歲獨生女卓林關係近年惡化，隨着卓林外籍同性伴侶Andi出現，更加深母女間的嫌隙。吳綺莉日前接受本報記者專訪時談母女情，問可覺得卓林「有事就媽咪，冇事就nobody」時，吳綺莉力撐卓林說：「我又唔覺得係囉。我唔係幫自己個女講嘢，其實我個女好乖，不過好容易受人影響。」吳綺莉認同跟家人相處，會特別容易發脾氣。「呢個咪就係我學嘅嘢囉，冷靜啲，唔好咁容易爆，特別屋企人。」談到跟卓林相處，「我學識尊重我個女囉」，並坦言跟Andi「其實冇乜溝通」。
撰文：魯吉
攝影：林賓尼
相嗌唔好口
吳綺莉（Elaine）主演的ViuTV新劇《理想國》之《苟延殘喘》單元下月初推出，劇中她跟林祖輝的9歲兒子，與媽咪嗌交後自殺身亡。由睇劇本到正式演出，Elaine心情都相當沉重，連監製陳翹英也笑說：「好在拍幾日，如果拍多幾個月你會黐咗線。」
現實生活中，Elaine母親的角色已經夠沉重。99年11月為已婚的成龍誕下私生女吳卓林一刻，兩母女一舉一動也成為全城焦點。幾年前，Elaine與卓林關係惡化，母女各自報警求助，日日成為各大報章頭條新聞。直至前年，17歲的卓林宣佈出櫃，跟年長12歲的加拿大籍女友Andi相戀，再到去年二人被拍到在加國流浪，去年11月於加國結婚，一切一切，都令Elaine成為新聞焦點。
究竟劇中媽咪角色跟現實中可有相似地方？45歲的Elaine日前接受專訪時說：「咁又冇喎，因為成個家庭背境唔同、成件事唔同，不過鬧細路，每一個阿媽都試過，我覺得係要溝通多啲。我睇完古仔，嗰刻對父母或者細路哥都係一個好大嘅提醒，我哋細個可能簡單啲，𠵱家社會所有嘢競爭大咗，父母一定希望自己細路好，由幼稚園開始要學好多嘢，好大壓力，以前大學畢業一定搵到工，𠵱家行出街基本上個個都大學畢業，變咗壓力係好大，有時壓力大時講嘢會大聲咗，唔好講話父母仔女，屋企人都會，就係提醒大家有時要平靜少少，有時相嗌唔好口。」
拍完此劇後有沒有得着，譬如改善了她與卓林關係？「其實咁講，我係有另一番體會之後先去接呢套劇，我唔可以控制你開心唔開心，你嘅負能量正能量係影響到人哋㗎嘛，我覺得年代唔同，無論父母仔女，大家壓力其實大過以前，當你壓力大，大家都會碰撞，呢個碰撞，大家都會做一啲可能衝動咗嘅嘢，傷害對方嘅嘢，而令到件事向咗唔好方向發展，其實我係有一啲體會，所以我接呢套劇，對所有人都係一個提醒，有乜都好，慢慢講、慢慢傾。朋友話我以前啲脾氣好急好快，呢啲要自己去改變囉，𠵱家啲朋友急，我就會話慢慢嚟、諗諗先，唔好咁衝動，定啲嚟，香港地方細，大家都會好急好快，拍呢套劇係一個好大嘅提醒囉。」意思是跟卓林之間不經意講出一些傷對方的說話？「當局者迷，旁觀者清，喺你好忙碌做緊嘢時，屋企人又好朋友又好同事又好，你顧唔到咁多嘢，有時你會忽略咗別人感受，呢樣嘢你咪要慢慢去學囉，站喺別人角度去諗件事，咁可能好多嘢會好好多。」
Elaine認同跟家人相處，會特別容易發脾氣。「對屋企人梗會大聲咗，大家唔熟一定客氣好多……呢個咪就係我學嘅嘢囉，冷靜啲，任何事都冷靜啲，唔好咁容易爆，特別屋企人，越親越會語氣重啲。」
學尊重包容
卓林去年在加拿大跟Andi結婚後，未知Elaine跟卓林之間相處有沒有不同？是否已經接受了Andi？Elaine想了一會說：「不如咁講啦，我學識尊重我個女囉，當然我都有我底線喺度，我唔會講你唔好咁咁咁，我會覺得溫馨提示囉，所有嘢都係。」
卓林跟Andi結婚後，跟Andi溝通會否多一點？Elaine未有正面回應，只說：「我只係會去諗我個女，佢嘅感受。」問Andi會叫她做auntie、媽咪、英文名Elaine，還是沒有叫過？「我真係唔係好記得，唔係講笑，其實冇乜溝通。」難道見面打招呼也沒叫你auntie、媽咪一聲？「真係冇喎，點吓頭囉。」是否還未接受女兒這段婚姻？「每一個人選擇嘅嘢，我唔會批評啱定唔啱，但我都話有我底線喺度，唔係接唔接受，而係你一定要去接受，因為嗰個係一個個體，唔理你個仔又好女又好，老公又好老婆又好，都係一個個體，冇得畀你接受唔接受㗎喎，你一定要去接受，只係你自己點樣去消化嗰件事，唔代表我要喜歡或者唔喜歡，我唔會答你我喜歡或者唔喜歡，因為呢個唔係我選擇，係你（卓林）嘅選擇嚟㗎嘛。」
愛一個人會包容身邊的人，若你錫女兒，該會接受她另一半，例如王賢誌父母也接受他同性婚姻。「其實唔關同唔同性事，觀點與角度，我反而覺得同同性婚姻冇乜關係。」到這一刻也未接受到Andi？Elaine想了好一會才說：「唔會諗囉！唔係到你揀，你只可以去包容、去接受，邊有得畀你想定唔想？你只可以諗第二個方法，同埋去消化件事，解決問題。我會同個女溫馨提示，乜嘢係好，乜嘢係唔好，你已經冇得話啱與唔啱，我覺得咁樣係最舒服嘅，你所有朋友我都接受。」
跟卓林有否保持電話聯絡？「我會留言囉。佢會睇。我覺得有啲嘢唔好去到一個執着，如果執着佢唔覆我電話，我覺得做乜都好，我學到一樣嘢，所有嘢都係盡做，你問心無愧，你做到嘢、諗到嘅就做，但係用一個溫柔少少嘅方法，唔好諗點解我同你咁客氣，做乜你畀個咁嘅反應我呀？唔好諗呢啲嘢，咁你會開心好多。」
我個女好乖
去年卓林與Andi欠租被追數，結果驚動警方，吳綺莉要出手解圍，現時仍有給卓林零用錢？「你要讀書嘅，學校老師喺度，但你要唔要做呢樣嘢，係你嘅選擇，我逼唔到你，屋企你要返嚟嘅，你隨時都可以返嚟，我覺得每一個成年人都有佢自己嘅崗位去做自己應該做嘅嘢，你要讀書，做到嘅嘢我會做，我頭先都有講底線嗰樣嘢，通常啲阿媽都會諗多咗，我唔去講，咁邊個講呢？返番去頭先講嘅嘢，應該畀嘅我會畀。」
卓林早前表示自己現時有兩份工作，生活費自己負責。Elaine表示：「我覺得係人生經歷嚟，每個人要經歷一啲嘢，你先學到一啲嘢，先至會長大，你經歷可以諗歪咗，但經歷亦可以令你正面咗，你控制唔到任何一樣嘢發生，控制唔到任何人、任何一件事，你唯一控制到係你自己，你要畀佢自己試，畀佢自己經歷，冇人想唔開心嘅事發生。」
可覺得有事就媽咪，冇事就nobody？「我又唔覺得係囉。其實我個女好乖，不過好容易受人影響，同好容易受感動。佢係一個好乖嘅細路，咁人係會有壓力㗎嘛，只係大家年紀唔一樣，我年紀大過佢，經歷多過佢，我曾經有段時間都好似佢咁樣，由16歲到26歲呢段時間，唔知自己做緊乜嘢，再加埋身邊會有好多唔同嘅人影響你，係要去到某個年紀，你先至冇咁俾人影響，即係我唔係幫個女講嘢，但我由細到大係會俾人影響，你係去到某個位，你先會發覺企返喺自己度諗，每一個人最後負責任係你自己，係對你自己負責任，呢個都要係你生活成長過程入邊去慢慢體會慢慢學。」
希望搵到伴
早前台灣有傳媒指卓林與Andi分手，又指Andi要爭成龍數十億港元家產。Elaine笑說：「其實我冇睇新聞，我唔想評論別人。」感情生活dry足多年，可希望找個伴？「我覺得所有嘢都係可遇不可求，我又冇唔畀機會人，又冇特別去搵，你話我變態又好乜都好，呢樣嘢都係順其自然好啲。」完全沒有人追求約去街？「唔係冇嘅，我又唔會專登去搵個人拍拖，你話搵個伴好啱傾嘅，大家好志同道合嘅，我會希望搵到㗎，但你唔會想搵個返屋企同你嗌交，大家價值觀好唔一樣，細個拍拖，同𠵱家想搵嘅係兩樣嘢，愛情可以係麻木嘅。」
難道一世女不渴望穿婚紗行婚禮？「邊個唔想買六合彩中，我諗冇人唔想唔要贏，感情係要去經營，你要遇到一個啱嘅人，呢個年代你唔會拍過一次拖，梗有一次兩次，我呢個年紀唔係細個，你唔想去麻煩自己，好似睇新聞，我唔睇，我淨係做我要做嘅嘢，唔好影響到我，感情我都係同一個處理方法，如果我遇到個好啱傾嘅，大家可以傾到偈，可以維持到，大家可以令大家開心嘅，如果唔係工作上合作，完全冇任何利益衝突下嘅朋友，我覺得去到某一個年紀，你係會選擇嘅，你唔會想帶麻煩畀自己，其實同男朋友一樣。」
對男朋友和結婚對象，Elaine似乎幾揀擇，「我覺得係要，人生苦短，到你26歲時，你會唔想嘥時間，唔好嘥時間去諗無謂嘢，唔會想搵個人同你嗌交。」最後膽粗粗問她近年有沒有跟成龍聯絡？她即瞪大眼笑說：「除咗我自己、我個女，你問我屋企隻貓，啲關我事嘅嘢，我會答囉。」
化妝及髮型：Aimie Cheung of MOD makeup academy
服裝：I.T、 Giuseppe Zanotti
