既然警方罕見地拒發不反對遊行通知書，今天你會一支公入元朗買老婆餅，或者替六四罪人李鵬送終嗎？要知道，那是一爿彌漫奇異自尊的區域，種種關於鄉親保衛家園的古老傳說，城市人一直交頭接耳，堅定抗拒異鄉客破壞祖宗規矩的脾氣，賞識者詬病者參半，雖然近年打扮趨時的中產階級紛紛往YOHO進發，並不表示人心隨着市容忽然摩登，十八鄉鄉委會的威猛仍然毋庸置疑，長老高調聲明假若批准遊行「一切嚴重後果將全部由警方負責」，並非林鄭式龜縮，或者乖乖把維持治安重擔交番畀正式錄用的警察，而是曲線恫嚇。丁屋冇你份住，祖墳冇你份拜，盆菜僅限一年一度，外部勢力如果跳到「元朗人，元朗自己救」的結論，算不算風涼水冷袖手旁觀？同文馮君說得好，「光復元朗」近乎詞不達意，人哋又唔係停電又唔係日蝕月蝕，使鬼你山長水遠走去點蠟燭，直腸直肚亮出「反恐反黑」更名正言順。而反恐反黑，唔怕得罪講句，今時今日香港地度度皆宜，又何必畫地為牢局限在元朗？
定性呢家嘢飄忽過乜，百萬人和理非遊行遭惡警噴霧射彈，可以被屈暴亂，逾千白衫軍地鐵內外圍毆無辜市民，鐵證要幾多有幾多，居然只不過是「非法集結」，特首牌循環錄音機甚至懶得啟動，得閒就扮靚靚去飲，繼續以唔識買廁紙的優雅身段「謙卑聆聽各方意見」。是日臉皮最厚金句王，我擇警務處新界北總區指揮官曾正科，除了指七二一無警狀態與市民期望「有少少落差」，被質疑為什麼接報後四十分鐘警隊才姍姍來遲，答道「相信冇八個字咁耐？呀，三十九分鐘！」