勇武抗賊！阿仙奴球星奧斯爾、哥拉辛拿斯禮拜四喺倫敦北部揸車時，成為兩名揸電單車持刀蒙面匪徒嘅獵物，兩人俾賊追足1.6公里，然後決定落車，花名叫「坦克」嘅哥拉辛拿斯，手無寸鐵咁揮拳擊退兩個賊佬，不過哥拉辛拿斯未上番車，原本走咗入間餐廳避難嘅「奧燒」，已經出嚟開車走。
哥拉辛拿斯徒手抗兩賊
呢件事由網上短片流出，單睇條片已經知非常驚險，片中見奧斯爾同埋哥拉辛拿斯，喺周三約下晝五點，架車泊咗喺北倫敦街頭，2個持刀匪徒就嚟個2打2，喺前座乘客位落車嘅哥拉辛拿斯，面對旁邊一個持刀匪徒，徒手揮拳嚇走佢，再去車後嚇走埋另一個，奧燒原本走咗入附近一間土耳其餐廳，嗰度嘅侍應同廚師都衝出嚟幫手，而且奧斯爾都開車走人，匪徒見事敗搶唔到車就揸電單車走人。阿仙奴證實呢單光天化日嘅劫案係堅，仲發聲明話有同兩個球員保持聯絡，佢哋都冇大礙。
英國《每日郵報》引述一個目擊者話：「當時奧斯爾好驚，我見到有個揸電單車嘅人追佢，佢就走入一間餐廳，匪徒戴住頭盔，唔知如果奧斯爾俾佢哋捉到會發生咩事。」倫敦警方發言人就話，暫時未有涉事人士被捕。
相對奧斯爾嘅較腳，同樣史浩克04青訓出身、同奧斯爾識於微時嘅哥拉辛拿斯非常勇武。身高1米83、體重約82公斤嘅波斯尼亞國腳哥拉辛拿斯相當大隻，所以有「坦克」外號，亦都有人叫佢做「破壞者」同「變形俠醫」。
識於微時兩脇插刀
26歲嘅哥拉辛拿斯咁勇武都有原因，90年代前南斯拉夫處於戰亂，爆發波斯尼亞戰爭，哥拉辛拿斯父母當時都要逃亡，佢就1993年喺德國卡爾斯魯厄出世，2013年決定選擇代表祖國波斯尼亞比賽，放棄青年軍時代代表嘅德國。
哥拉辛拿斯喺11年加入史浩克青年軍時，奧燒已轉咗會，不過兩人據報好細個時已相當老友，亦同信伊斯蘭教；到17年哥拉辛拿斯自由身加盟阿仙奴，兩人終於做隊友。哥拉辛拿斯同奧斯爾分別喺今夏結婚，互相有出席賀賀佢。今次劫車事件，哥拉辛拿斯為咗保護老友，義無反顧用雙手對雙刀，人生有個真正朋友，的確好極。