法甲豪門巴黎聖日耳門（PSG）已展開亞洲之旅，今日進行訪華首場熱身賽，喺澳門同意甲嘅國際米蘭交手。PSG比賽前先搞新意思，一班球星尼馬同基利安麥巴比等化身模特兒，周四喺深圳行天橋，展示PSG今季各款新球衣。尼馬上月代表國家隊比賽受傷，被迫退出巴西嘅美洲國家盃陣容，雖然佢傷勢已無大礙，有隨大軍到亞洲，但未必馬上會喺今日對國際米蘭上陣，但行天橋對佢嚟講就綽綽有餘。對PSG有離心嘅尼馬，今夏想走人嘅情況一直未有進展，據西班牙加泰羅尼亞傳媒話，巴塞隆拿仲想尼馬回巢，並望尼馬拒絕喺中國熱身賽上陣製造內亂，逼令PSG減低收購尼馬轉會費價錢，減低收購難度。