英國BT Sport周四喺網宣佈，前阿仙奴同曼聯嘅荷蘭籍射手尹佩斯（RVP），新球季將加入BT Sport成為評述員，會同前曼聯球員里奧費迪南、史高斯、夏格維斯等合作，負責評述英超、英足盃、歐聯同歐霸盃等賽事。BT Sport又話，作為前英超、英足盃同歐霸盃冠軍成員，尹佩斯有能力喺比賽進行深入分析。今年夏天喺荷蘭球會飛燕諾退役嘅尹佩斯話：「我期待呢個新挑戰，畀我第一次離開球場，進入廣播室。」至於前荷蘭國家隊前鋒古華特，就重返巴塞隆拿出任球會青訓總監。巴塞拉瑪西亞青訓產品曾聞名於世，但近年打出名堂嘅球員唔多，43歲嘅古華特退役後做過唔少管理層同教練工作，但成就一般，可唔可以重振巴塞青訓聲威，令人質疑。