現年44歲的雪兒於1997年憑與郭富城合演廣告走紅，其甜美的樣子瘋魔一代少男，及後參與電視、電影及推出唱片，直到2010年嫁予酒店業富商Ajai Zecha後定居新加坡淡出幕前，過着幸福少奶奶的生活，閒時與老公切磋巴西柔術。
撰文：曹家誠
攝影：陳慧安
雪兒近年復出幕前工作多多，不少人驚嘆她身材樣貌恍如「不老症」般完全沒有變過，早前雪兒來港出席化妝師好友Annie G. Chan的活動，順道在尖沙嘴接受《蘋果》訪問，分享凍齡和駐顏心得。
茹素喼弗
要活得健康需要飲食、運動和充足休息缺一不可，雪兒表示婚後經常要陪伴老公出埠公幹，故平日在家會盡量保持規律生活，她說：「每個人體質唔同，最緊要了解自己，我就一定要有充足睡眠，唔使做嘅時候，我夜晚10點瞓覺朝早7點起身，然後要帶幾隻狗散步，跟住返嚟整早餐睇吓書再做gym。」近年茹素的她表示向來消化系統麻麻，戒食肉後感覺更健康：「少食肉我反而覺得仲有energy，另外最緊要係心情開朗，個人開心對外表都有影響。」
外表柔弱的雪兒稱一向都有做瑜伽和伸展運動等較靜態的運動，但近日轉了口味開始嘗試激烈的運動，她說：「啱啱開始接觸打拳同巴西柔術，我都幾鍾意，因為除咗動作大技術要求高外亦要用腦，要諗點樣去鎖人同拆解。」她更透露原來丈夫也是巴西柔術的愛好者，兩人可有在家互相切磋指教？雪兒笑說：「我都有㗎，但係佢話等我練得好啲先，應該係驚我整親佢，不過佢好含蓄咁話：『你好似唔係好熟，練多啲先啦！』哈哈。」
樂做後母
婚後的雪兒更負起照顧丈夫Ajai Zecha與前妻所生的一對兒女，故多年來都沒有打算再要小朋友，她說：「我識佢哋嘅時候一個五歲、一個六歲，所以都需要好多時間去take care，後來兩個都喺外國唔同地方讀書，雖然係寄宿但隔幾個月就要飛過去參加學校活動，有時佢哋放假我又要留喺嗰邊，所以都花唔少時間跟住佢哋。」現在子女們已經畢業，雪兒稱現在有時間參與更多幕前工作：「其實係一個好好嘅timing，兩個小朋友開始唔需要我嘅時候，古天樂同葉偉信就搵我拍《貪狼》，一路到𠵱家都有唔同機會畀我試。」
期待《尋秦記》開工
雪兒去年演出電影《殺破狼．貪狼》復出幕前，她表示丈夫Ajai Zecha相當支持：「佢好support，其實佢自己都越嚟越忙，佢話最緊要我開心，鍾意做就去做。」
古天樂早前公佈會開拍電影版《尋秦記》，雲集當年電視劇包括雪兒、宣萱及郭羨妮等原班人馬演出，雪兒表示電影會在下月開工：「我自己相當期待，成班演員重聚好似一個re-union，上次記者會見到大家感覺已經好sweet，大家都冇乜變過，係啲男仔個樣成熟咗少少。」雪兒表示感動之餘，同時亦是一個挑戰，皆因劇本及角色仍然保持着神秘，但她相信屆時是開心的驚喜。
場地提供：南瀛水產
化妝：Jennifer Chan of Annie G Chan Makeup Centre
髮型：Chris Cheng of Ilcolpo platinum
服裝提供：Edition and MO&Co.