現年34歲Boy'z成員張致恒（Steven）噚日喺Ig貼出一張同女友雯雯嘅自拍照並留言：「感恩！我們將踏入人生另一階段，謝謝你！」好友鄭希怡（Yumiko）立即回覆：「wow，恭喜你呀！」眾粉絲亦恭喜Steven，同時留言向38歲關智斌（Kenny）催婚。有傳Steven跟28歲女粉絲雯雯交往，女方近日仲為佢生咗個仔，佢哋上周為BB搞百日宴，Steven馬上畀女友名份。
Steven分享婚訊，佢嘅前經理人霍汶希（Mani）噚日話：「我哋有個group，阿Sa、阿嬌等個個都恭喜緊佢呀。」Steven舊愛、「波波姐」莊端兒噚日都有大方送祝福：「有點意外，但好開心有好消息呀！祝佢哋幸福美滿！」Kenny就話：「恭喜晒我個好兄弟Steven，我聽到呢個消息都有啲驚訝同突如其來，又開心，佢喺人生度行入另一個階段，我呢排成日同佢一齊做嘢，都覺得佢越來越成熟，喺呢度祝福佢。」
情史多籮籮
Steven剛出道時曾同鍾舒漫拍拖，2013年因「漏M女」孫旗介入導致分手，其後孫旗控訴Steven奪咗佢嘅「初夜」後即受冷待致分手，不過，Steven當時否認兩人曾經拍拖，只承認同對方有過一夜情，自認「衰鹹濕」，跟着Steven跟莊端兒相戀，但2015年Steven被爆背女友追富貴台妹，Steven公開道歉兼宣佈結束兩年情，Steven喺2016年同舞台劇演員梁皓恩（April）公開戀情，讚女友令佢變得成熟，但今年Steven又被揭有新女，盛傳背正印April偷食，原來佢最後情歸女粉絲雯雯。
撰文：馮仁昭
