建制派何君堯嘅父母墳墓被毀，何君堯當然悲痛莫名，大鬧人神共憤，但係鄉議局主席「發仔」劉業強前日竟然疑似「有時真係忍唔住笑」咁話如果件事屬實，「以何律師嘅性格，我諗佢應該報咗警」，網民仲將段片cap晒圖放上網，自然引起議論紛紛，劉業強噚日就澄清，話自己當時有咁嘅反應，只係覺得成件事難以置信箒。
何君堯父母嘅墳被毀，劉業強竟然笑住嚟回應，令到唔少網民都覺得相當耐人尋味。噚日劉業強就回應星期六7.27元朗遊行之餘，仲主動譴責破壞何君堯父母墳墓嘅行為，話有咩不滿都應該用合法形式表達。呢次佢係非常之認真咁講，一啲都冇笑㗎。
「唔信有咁嘅事發生」
唔少網民都思疑整爛墓碑嘅人唔係普通人，甚至都係鄉事中人所為。噚日都有記者問起劉業強，其實鄉議局有冇了解過成件事嘅來龍去脈呀？同埋成單嘢會唔會關鄉事派嘅事㗎？劉業強繼續冇展露笑容，相當之認真咁話，其實日前佢回應嗰陣係「唔信有咁嘅事發生」、「當時我以為講笑」、「以為係惡作劇」，仲話𠵱家網上咁多改圖，都唔知啲圖真定假嘅，解釋之餘，劉業強仲順便譴責埋何君堯嘅議員辦事處遭到破壞，真係相當真誠。
另一邊廂，噚日有份同劉業強一齊開記招嘅上水鄉事委員會主席侯志強，就被問到今個周六遊行嗰陣會唔會又派水時就話稱，「上次派晒啦！（會唔會參與遊行？）我睇得唔得閒，得閒咪行吓咯」。
李八方