前日有人用台灣《蘋果》記者證嘅改圖，作咗封「《蘋果日報》記者致香港人家書」，用嚟抹黑《蘋果》，有個用梁粉作家屈穎妍做頭像、專貼屈穎妍文章嘅fb專頁「心在穎妍」貼咗篇文，點知引嚟鋪天蓋地網民洗版，有成幾千人留言，九成九係鬧屈穎妍貼假圖搞抹黑，認真熱鬧。
到噚日「心在穎妍」管理員發文，話自己只係屈作家嘅粉絲喎，專頁所有嘢屈作家並不知情，如果令人誤會專頁係屈作家本人搞，因為咁令屈作家受嚴重人身攻擊，佢要向屈作家道歉，又話之前貼《蘋果》篇文冇謹慎審查，要向屈作家支持者致歉。嗰篇文亦已刪除，不過管理員刪除有關文章原因就相當神奇，唔係因為篇文真實性有問題，而係「因為太多口沒遮攔，惡意中傷，蛇蠍心腸，攻擊屈小姐的言語」，即係刪文只係次要，刪嗰幾千個鬧屈作家嘅留言先係重點！「心在穎妍」管理員真係極撐屈作家，話明以後繼續貼文！不過繼續有網民留言照鬧，仲有網民留言為《蘋果》討公道，「被傷害了的是《蘋果日報》，沒有見到道歉」，網民果然心水清。