動盪時刻，網上消息快過閃電，音頻視頻傳之不盡觀之不足，真真假假撲朔迷離，情商智商雙雙考起。連天生疑心重的我，也一而再上當，假作真時專欄照抄，幸得美貌與智慧並重的編輯把關，才不至於唔覺意成為散播fake news共謀。見過鬼怕黑，乍聞執葉何雙親墳墓被毀，當然完全不信，有圖有真相都咁話，除了自幼遭英式教育荼毒的前殖民地渣滓，諗都冇諗過懲戒或報復可以包括破壞祖墓，最主要還是因為不能想像嗰隻九唔搭八嘅怪物，竟然也有父有母。怎麼可能呢？莫非波蘭斯基的《魔鬼怪嬰》其實是真人真事，米雅花露產下的魔童幾十年後變成肚腩男虐行香港，借黑幫勢力攬實林鄭盧偉聰一鑊熟？如果真係咁，唔該拍完《從前，有個荷里活》揚言收山的塔倫天奴留步，當繼續向李小龍致敬又好，當添加東方元素翻炒《希魔撞正殺人王》又好，大鑼大鼓將這一役搬上銀幕先至告老歸田都未遲吖。
網民發起聯署，促請白宮禁止何妖及其直系親屬入境或移民，雖然應該真有其事，但似乎用錯氣力：人哋咁愛國愛黨，香港四面楚歌企唔住腳，係移都移去大灣區啦，美國有乜咁巴閉，外國勢力放個屁都特別香乎？至於瘋傳他搵人做完嘢唔找數，街頭招貼一字一淚「有汗出冇糧出」「專呃同門」「借元朗手足過橋」「食夾棍呃兄弟錢」，既無怵目驚心的紅漆，字體又端正美麗，fake得咁假，笑過就算；那兩段白衫大佬電話錄音才精彩，縱使勞氣追數，粗口稍嫌酌量，和黃毓民的全程問候冇得比，真實情況有待商榷，至於你們信不信，反正我信了。