《經濟日報》前副社長石鏡泉就算辭咗職，繼續有大把花生食。持有《經濟日報》超過6%股權嘅獨立股評人David Webb（圖）噚日就揭露自己有份逼宮炒人，兼話石鏡泉言論煽動他人使用暴力，導致有人身體受傷，已經觸犯《公安條例》第26條，應該要被起訴。
Webb喺網頁中透露，今個星期一通知咗《經濟日報》，會喺聽日嘅股東會要求石鏡泉離任，希望持有超過10%股權嘅港大同意建議。結果石鏡泉星期二晚已經走人，連專欄都暫停。
有不願具名嘅大律師透露，石鏡泉喺公開場合兼群情洶湧嘅氣氛下發表「藤條教仔論」，跟住第二日真係發生咗藤條打人一事，有晒片做證據，有足夠表面證供，律政司可以起訴佢，不過都要睇律政司做唔做嘢。根據《公安條例》第26條，一旦罪成，最高刑罰為監禁五年。