近排香港發生一大堆警民衝突事件，班警察成日舉起「停止衝擊，否則使用武力」嘅紅旗，估唔到遠在中國南京練緊波嘅C朗都有樣學樣，只不過衝擊對象就唔係香港警察，竟然斗膽突襲嘅係內地公安，該當何罪呀？
網民笑稱將被行政拘留
事緣祖雲達斯星期二已經到咗南京，備戰噚日對國際米蘭嘅國冠盃。點知訓練期間，有一位中國球迷衝咗入球場，睇怕都係想搵一班祖記球星簽名，可惜呢位球迷仲未埋到一班球星身邊，已經俾一大班保安制服咗。喺網上片段見到，一大班黑衫嘅保安入嚟，零零舍舍有位着藍衫嘅公安出現，想幫手制服嗰位球迷。呢個時候出名百厭嘅C朗就突然行到嗰位公安身後，然後用力飛撞對方，後者都俾佢嚇咗一跳，但轉身見到係笑笑口嘅C朗，就應該知道佢係玩嘢，所以只係揮手叫佢唔好再玩。
內地網民見到咁嘅情況，當然出嚟抽水，話C朗呢個動作足以被帶返派出所問話，仲有機會被行政拘留喎！不過，有網民就分析C朗咁做嘅動機唔係純粹貪玩，而係覺得一向好愛錫球迷嘅佢，唔滿意班保安同公安好似好粗暴咁對待球迷，所以先咁樣飛撞發洩，即係好似之前劉德華喺成都開演唱會咁，見到保安粗暴對待歌迷，結果衝落台推開班保安。
ig吸金力運動員第一
點都好，C朗唔會因呢件事有咩麻煩，同埋佢有錢就係人都知，最近排程工具網站HopperHQ仲做咗個統計，話C朗喺今年ig社交網運動員富有榜中排第一。佢係所有運動員入面擁有最多追隨者，平均每次出post就可以收到78.4萬鎊，即大約760萬港紙，遠超第2位尼馬嘅58萬鎊。
講番噚日場國冠盃，正選上陣嘅馬菲斯迪歷特喺10分鐘一次國際嘅角球攻勢擺烏龍，令祖記半場落後0:1。不過喺換邊後68分鐘，C朗主射嘅罰球省中人牆改變方向破網，幫祖記追平，雙方法定時間踢成1:1，要射12碼決勝，最後祖記互射12碼贏4:3，拎到國冠盃首勝。