【黑鏡線索】
先係行商場變真血拼，然後搭地鐵變廝殺列車恐襲，朋友圈中，最和理非最冷感最維和嘅，都喺fb爆晒粗口閙爆冷血政府，仲未計西環三十六槍。
大家其中一點嬲嘅係，777政權，由扮初心硬推送中開始，不停咁做戲做大龍鳳呃人，大話冚大話，搵啲爛頭卒做核突嘢自己企後排扮無知，又熄機又稱恐襲為非法集結，演技差勁到簡直係侮辱市民嘅智商。實情我估777政權都知台戲爛，佢只不過係想呃上頭自保，香港人嘅死活，佢根本冇放在眼內。
所有政權，比起普通市民多至少兩種特權。第一種，係使用程序暴力，例如特區政府DQ唔順眼嘅參選人，莫須有終身剝奪政治權利，又例如DQ完之後夠票，話之你佢想送中就硬推送中，當你二百萬人大熱天時遊行係廢嘅，送你班和理非一程。第二種，係使用肢體暴力，呢一點唔使舉例子，而家香港正常小學生都對警察嘅作為可以如數家珍。
資訊自由 政權屈機冇咁易
如果政權係民意授權，喺動用以上暴力時，點都要諗多一諗，唔係話出就出。特區政權唔係民意授權，急起上嚟乜掣都㩒，正如曾鈺成話齋，呢個係設計缺陷，一日唔改做一人一票選特首同立法會，一日都唔會解決得到，解決唔到，就好似今日咁，即係將偉大總設計師嘅「高度自治，港人治港」核心思維，丟咗落海。
以上特權，本身已經屈機。再加上，喺科技發展配合下，可以更進一步，更細緻更深入咁，用監控燈柱，社會信用系統等等，將人民進一步散沙化，去到最盡，即所謂數碼列寧主義，將極權嘅列寧主義用資訊科技去強化。呢一類做法同政策，喺免疫力同公民自發凝聚力比較強嘅自由世界國家，已經係一個好多公民關注同防範嘅議題。
香港以前有百五年儲落嘅底氣，移交廿二年未耗盡，趁散沙化程度，仲未去到某強國咁嚴重，仲有空間去抗衡數碼列寧類嘅政策。問題係，呢類政策，唔會燒你十萬億，比較隱性，又可以循步、煮蛙式推行，既可以用其他惡法如送中等做掩護，又可以用大家貪着數貪小便宜嘅心態利誘，到大家見到問題明顯嚴重，一日發覺好似強國咁連打機都要實名制，已經太遲。所以呢一塊，將會係關鍵之地。
科技唔係淨係政權識用，市民都識。反送中運動開始，網上三寶係連登、telegram同fb live，三樣夾埋，將以前用開嗰套操控輿論嘅心法，控制報紙同發牌電視台，廢咗至少一半武功。強國政權，慣咗uneven playing field，資訊不自由嘅環境屈機，喺資訊自由嘅地方，出現水土不服好合理。問題係，政權要令市民用唔到網絡，比起市民令政權用唔到科技，容易得多。當然呢一步係非常焦土，但係去到今日，已經冇乜人夠膽講，777嘅焦土嘅底線喺邊度。
撰文：宋漢生